RG: Kaaviaartitat appariaateqaraluartut naatsorsuutit kusanartut
Namminersorlutik Oqartussat suliffeqarfiutaanni ingerlalluarnerpaat ilaat - Royal Greenland - ukiumut nalunaarutini 126 millioner koruuninik angusaqarpoq, ukiup siulianut sanilliullugu taamaallaat 3 millioner koruuninik ikinnerulaarlutik. Taamaammaat aqutsisut ukiumoortumik angusat naammangisimaarluarpaat.
Qulequttami ataatsimi sanngiiffeqarpoq: kaaviiaartitat. Kaaviaartitammi 5,2 milliarder koruuniullutik 450 millioner koruunit missaanni appariaateqarput. Aqutsisullu paasissutissiaraat, appariaateqarneq tunisassaangaluit 500 millioner koruunit missaanniittut taamaatinneqarsimanerat.
- Tunisatigut kinguariaateqarneq ilaatigut Europami niuertarfeqarfinnut kapisilinnik assigiimmik angissusilinnik annertuunik tunisassiornissaraluamik taamaatitsisoqarneranik ilaatigullu saarullittat ikerinnarsiorlunilu aalisagartat annikinnerunerannik tunngaveqarpoq, ingerlatseqatigiiffik paasissutissiivoq.
Appariaatit
Ukiumoortumik nalunaarusiami aqutsisut oqaatigaat, aningaasaat nalingi apparaluartut Kalaallit Nunaannilu aalisarnermut akitsuutit qaffanneqarsimagaluartut angusat kusanartut.
Aningaasat nalingi aalisarnermullu akitsuutit ukiumoortumik nalunaarusiamut 100 millioner koruuninik appariaateqarfiusimasoq, aqutsisut paasissutissiaraat.
- 2018-imi ineriartorluarneq ingammik raajat uutat qalipaajakkallu aammali qalerallit, saattuat raajallu qalipallit isertitaqarfiulluarnerannik aallaaveqarpoq. Ingammilli kingullertut taaneqartut Kalaallit Nunaanni aalisarnermut akitsuutit qaffanneqarnerannik aallaavilimmik unammillernartoqarfiusimapput, ukiumoortumik nalunaarusiami allassimavoq.
Nunarsuarmi pilersuisutut pingaarnertut inissisimanissami periusissiaq 2018-imi 75 procentimik angusaqarfiuvoq. Ukiut sisamat matuma siorna 41 procentimiissimalluni.
Sulisut ikinnerit
Sulisut 2017-imi 2.533-it sulisorineqarsimapput ukiorlu kingulleq 2.228-t sulisorineqarsimallutik. Kalaallit Nunaannilu sulisut ikileriaateqarsimanngillat. Killormuanik Kalaallit Nunaanni sulisut 2017-imi 1.363-iusimasut 2018-imi 1.487-iusimapput. Danmarkimi sulisut arfineq-marlunnik amerleriaateqalaarsimapput katillugit sulisut 205-inngorsimallutik.
Sinneqartoortutit affaat 126 millioner koruunit piginnittunut tassa Nunap karsianut tunniunneqassapput sinnerilu 63 millioner koruunit nammineq aningaasaatinut ikineqassallutik. Nammineq aningaasaatit katillugit 1,5 milliarder koruuniulissapput.