RG umiarsuarmik immikkut tunitsivissamik atuutsitsilersoq
Sisimanngormat ullup-qeqqata siornatigut angallat ”Maniitsoq”, kilisaat "Sisimiut", aalisartut saarullinnik uumatitsiviinik imaarsinermi ikiuuttussaq malitsigalugu Nuummiit aallarpoq.
Piffissami kingullermi saarulliit toqungasut pillugit videoliaq inuit attaveqaqatigiittarfiisigut sammineqarmat, Royal Greenland isornartorsiorneqangaatsiarpoq.
Aalisartut oqaatigaat, arriippallaamik tunisaqarniartarneq pissutaasoq, Royal Greenlandilli piffissami kingullermi sumiiffiit ilaanni saarulliit sooq toqorarsimanersut misissuineq aallartissimavaa. Ilaatigut sumiiffinni pineqartuni tarajoqanngitsumik imeqarpallaalersimanera pissutaatippaat.
Royal Greenlandimit saarullinnik uumasunik tunisaqarnissamut immikkut umiarsualiinissaq piffissami sivisuumi pilersaarutigineqarsimavoq, sisamanngormallu ingerlatseqatigiiffiup umiarsuaatai marluk Nuummiit aallartinneqarlutik.
- Ukiut kingulliit ingerlaneranni aalisartut saarullinnut uumatitsivinnik atuisartut amerliartorsimapput, ilisimaarilluarparpullu tamanna aalisartut sivisunerusumik utaqqisariaqartarnerannik kinguneqarsimasoq. Taamaammat pisariaqarsimavoq, umiarsuaatitta Maniitsup uumatitsiviit sukkanerusumik imaarneqartarnissaannut kilisaammut M/tr Sisimiunut ikiuutsinneqarnissaa, Royal Greenlandimi Attaveqaqatigiittarnermut pisortaq Masaana Egede Sermitsiaq.AG-mut nassuiaavoq.
Malittarisassat tamarmik malinneqartut
M/tr Sisimut Maniitsorlu uumatitsivinnik imarsinissamut ikiuukkiartorlutik sisamanngormat Nuummiit Kapisilinnukarlutik aallarput. Attaveqaqatigiittarnermut pisortaq naapertorlugu, tamanna coronamut atatillugu malittarisassat atuuttut ataqqilluinnarlugit pisimavoq.
- Tunisasssiornerup ingerlajuarnissaa malittarisassanillu atuuttunik malinnittuarnissarput qulakkeerniarlugit Coronamut atatillugu allaatoqarfik sulisoqarnermut immikkoortortaqarfitsinnit suleqatigilluarneqarsimavoq. Assersuutigalugu kilisaammi inuttat arlaannaalluunniit nunamukaratillu Kapisilinni inunnik attaveqassanngillat, taanna oqarpoq.
Nuup kangerluarni uumatitsiviit imaarneqareerpata, angallat ”Maniitsoq” kilisaallu "Sisimiut" Qeqertarsuartsiaanut, Kangerluarsussuarmut Kangerluarsorutsimullu ingerlassapput.
Royal Greenlandip uumatitsiviit atorlugit aalisarnera pillugu sakkortuumik oqallittoqaraluartoq, Royal Greenlandimit oqaatigineqarpoq aalisartut suli oqaloqatigilluarneqartut.
- Maniitsumi aalisakkeriviuterput aalisartullu immikkut oqalqoatigiilluartarput. Taamatut oqaloqatigiittarnitsigut ataatsimut naleqartitaqalersarpugut aaqqiissutissarsisarlutalu, Masaana Egede oqarpoq.