RG siusinnerusumut naleqqiullugu aatsaat taama sulisunik avataaneersunik pisariaqartitsitigaaq
Suliffeqarfiit angisuut suliaqarfinni assigiinngitsuniittut assut sulisussaminnik amigaateqarput.
Kalaallit Nunaanni suliffeqarfiit inuussutissarsiutinik ingerlatsisut aallaavimminnit amerlasuunik nalunaaruteqarput sulisussaqannginnerarlutik aamma sulisussarsiornerminni ajornartorsiuteqarlutik.
Aviisi Sermitsiaq taama allappoq.
Maannakkorpiaq tamanna aatsaat taamak tamanna ajornartorsiutaatigaaq. Tassani pineqarput suliaqarfiit pingaaruteqartut soorlu aalisarneq, sanaartorneq aamma takornariartitsineq. Kalaallit Nunaanni Sulisitsisut piffissami sivisuumi Naalakkersuisunut kimigiiserput Kalaallit Nunaata avataaneersunik sulisussarsinissaq ajornannginnerulerseqqullugu.
Kisianni kinguneqanngitsumik. Suliffeqarfiit sanaartornermik aamma entreprenøritut ingerlatsisut, hotelit, neriniartarfiit aamma aalisakkanik suliffissuit ataatsimik ataatsimoorfeqarput. Suli avataaneersunik sulisussanik pikkorissunik pisariaqartitsipput.
Tamatumunnga tunngaviuvoq nunanit allaneersunik sulisussarsinissap ajornarnera aamma sivisuumik ingerlasarnera. Tamanna Kalaallit Nunaanni suliffeqarfiit anginersaanni misigineqarpoq, ingerlatsivimmi Namminersorlutik Oqartussat pigisaanni Royal Greenlandimi, tassani nunanit allamiut amerlasuut sulisorineqarput.
– Suliffeqarfiit pisortat ingerlataat aamma namminersortut amerlanerit sulisussaminnik amigaateqarput. Ukioq manna ukiunut siusinnerusunut sanilliullugu Royal Greenlandip fabrikiini arlalinni nunanit allaneersunik sulisussanik pissarsinissaq ajornartorsiutaavoq. Immikkut unamminartoqartitsivugut Corona pissutigalugu aamma timmisartunut billetit amigaataanerannik. Air Greenlandimut billetinik naammattunik Danmarkimiit Kalaallit Nunaannut timmisartornernut pissarsisinnaasarsimanngilagut, inunnut Kinameersunut aamma Filippininerinut sulisussarsiarisimasatsinnut.
Søren Olsen Damgaard Royal Greenlandip HR-imut immikkoortortaqarfiani pisortap tullia, aviisimut Sermitsiamut oqarpoq.
Aviisimi Sermitsiami atuarnerugit: