RG-p pisortaanera: MSC-mik allagartalersuineq alloriariarneq pingaarutilik

Ippassaq qalerallit Kitaani avataasiorluni pisarineqartartut MSC-mik allagartalersorneqarnissaannik ippassaq akuersissuteqarneq, Royal Greenlandip pisortaaneranut Mikael Thinghuusimut, nutaarsiassatsialaavoq.

- Alloriarneq pingaaruteqarpoq, Mikael Thinghuus oqarpoq, nutaarsiassarli piinnarlugu suut tamarmik imaasiallaannaq iluatsinnavianngitsut taassuma tikkuarpaa.

Atuaruk: Qalerallit MSC-mik allagartaliinerit

- Neriunarpoq sinerissap qanittuani aalisakkat pisarineqartartut aamma MSC-mik meqqulersugaalernissaat, tamannami pingaaruteqarnerugaatsiarpoq, Mikael Thinghuus oqarpoq.

MSC-mik allagartalersueriaaseq avatangiisinut ajoqusiinngitsumik piuaannartitsinermillu tunngaveqartumik aalisarnermik ingerlataqartunut akuersissutigineqartarput. MSC-mik allagartalersuisarneq Naalagaaffiit Peqatigiit piuaannartitsinermik tunngavilimmik aalisarnissamut piumasaqaataanik naammassinnittuuvoq.

Sinerissap qanittuani tunngasut qanittumi pisinnaanngitsut

Sinerissap qanittuani tassa umiatsiaararsortunit angalatinilluunniit qaleralinniartartut pisarisartagaasa MSC-mik allagartalersortitsisalernissaq siunertaraarput, Mikael Thinghuusilu aallavigalugu tamanna qanittumi pisinnaanngikkallarpoq.

Atuaruk: Piuaannartitsineq atuisartunut pingaarutilik

- Imaasiallaannaq pisinnaanngilarput. Taamaaliorusukkaluaqaagut, kisianni ukiuni arlalinni biologit innersuussutigisartagaat pisassiissutigineqartartulli nikigasupilussuupput. Innersuussutigineqartut pisassiissutigineqartartulli taama nikingassuteqartuaannassappata, misiliinissaq asuli aningaasanik pinnguarnerussaaq, Mikael Thinghuus oqarpoq, tamannalu pissutigiinnarlugu tunniutiinnarusunngilaq.

Pitsaasoq

- Massakkut raajat, nipisaat suai, qalerallillu avataani pisarineqartartut MSC-mik allagartalersorsinnaavagut, ajunngitsumik ingerlasimavugut tamannali pitsaalluinnartuuvoq.