RG nipisaat suaannik 5.000 kilonik igitsiinnarsimasoq
Sulisussanik amigaateqarnerup tunisallu marloriaatinngorsimanerisa malitsigisaannik, Nuummi Royal Greenlandi nappartanik 45–nik nipisaat suaannik imalinnik igitsiinnartariaqarsimavoq.
Kalaallit Nunaanni aalisakkeriviit sulisut sulinngitsuukulasut sulisussaaleqisarnerlu qangali ajornartorsiutigilersimavaat. Tamatuma malitsigisaanik nipisaat suaat kiilunik tuusintilikkaanik oqimaassusillit atuisunut apuunnagit, "eqqaavimmut" igiinnartariaqarsimavaat.
Royal Greenlandip Sermitsiaq.AG.-mut ilisimatitsissutigaa, tamanna pisimasoq apriilip 24-ani aningaasarsisoqarmat aamma qaammatip naanerani aningaasarsisoqarmat.
Piffissami pineqartumi Polar Raajat tunisiniartunik mattussimmat, suaat tunineqartut annertuseriarujussuarsimapput, Royal Greenlandimit nassuiaatigineqarpoq. Siornamut sanilliullugu ukioq manna nipisanniarneq ajunngivissumik ingerlasimavoq, KNAPK Sermitsiaq.AG-mut ilisimatitsivoq.
Tassa aalisartut nalinginnaasumik 38-t nipisaat suaannik Royal Greenlandimut tunisisaraluarput, aalisartulli nipisaat suaannik tuniserusuttut 68-inngoriasaarsimapput.'
Maniitsoq ikiuuttoq
Royal Greenlandip suannik isumaginnittussanik sulisussaqannginnini pissutigalugu, ullormut nappartat sisamat aalisartumit ataatsimit tunineqarsinnaanngorlugit aaqqiissuteqarfigisimavaa.
Peqatigitillugu nipisaat suaat 11.000 kiilut Manitisumi aalisakkerivimmut nassiussimavai, taamatut inissisimasoqarnerani ikiuunnissamut periarfissaqarmat.
Royal Greenlandili assigiinngitsunik suliniuteqarsimagaluarluni nipisaat sunaannik 5.000 kiilungajalluinnarnik oqimaassusilinnik igitsiinnartariaqarsimavoq, suaat suli suliarineqartigatik ajortissimammata.
Naalakkersuisut maajip arfernani nalunaarutigaat, Nuummi Maniitsumilu nipisannik tunisiffissaq kingulleq tassaasoq sisamanngorneq maajip arfineq-aappaat.