RG-mi siulersuisut iluanaarutinik akiliinnginnissaq qinnutigaat

Royal Greenland iluanaarutinik akiliinnginissaanik Inatsisartut ilisimatinneqarsimanngimmata IA-mit isornartorsiorneqarpoq.

Coronamik ajornartoornerup Kalaallit Nunaanni isertitaqarfiusartut annersaat pingaarnersaallu aalisarneq sakkortuumik eqqorpaa. Avammut niuertoq soorlu Royal Greenlanditut ittoq kinguppaat aalisakkallu akiisa apperiarujussuarnerisigut aningaasarpassuarnik annaasaqarpoq. Aviisi Sermitsiaq allappoq.

Taamaattumik Naalakkersuisut piginnittut sinnerlugit Royal Greenland akuersaarsimavaat aningaasatigut ikiuiniarluni ingerlatseqatigiiffiiup tigoriaannarnik aningaasaqarnera nukittorsarniarlugu. Tamanna pivoq Royal Greenlandip iluanaarutinit nunatta karsianut millionerpassuarnik akiliinngineratigut. Siorna kinguppannik aalisakkanillu niuertorsuaq rekordiliilluni akileraartinnani 400 million koruunit missaannik sinneqartoorpoq .

Aviisi aqqutigalugu paasisaqartut

Partiilli illuatungiliuttut annersaani IA-mi siulittaasup Múte B. Egedep siusinnerusukkut namminersorluni inuussutissarsiuteqarsimasup Naalakkersuisut sakkortuumik assuarai .

Peqqutaavoq sapaatit akunnerani qaangiuttumi Sermitsiami Nalakkersuisuniunngitsorlu paasitinneqarneq, Royal Greenland Namminersorlutik Oqartussanut iluanaarutinit 134 millioner koruuninik akiliisanngitsoq .

Isumaqarpunga suliani taamaattuni soorlu Royal Greenland iluanaarutinit akiliisanngitsoq pillugu Naalakkersuisut Inatsisartut avaqqullugit aalajangiineq eqqumiillunilu assuarnartuusoq. Tamanna tusagassiuutit aqqutigalugit pivoq. Coronamik ajornartoornerup nalaani suliani taamaattuni Inatsisartut Naalakkersuisunit ilisimatinneqartannginnerat ajoraluartumik ileqquulersimavoq. Ajornartoornerulli nalaani silatusaarnerujuaannassaaq Naalakkersuisut suliniutiminni Inatsisartunit tapersersorneqarluarnissaat, Namminersorlutillu Oqartussat ingerlatseqatigiiffiisa aningaasaqarnikkut inissisimanerat ilisimatitsissutigalugu , Múte B. Egede oqarpoq.

Ilanngutassiaq tamaat aviisimi Sermitsiami atuaruk

Powered by Labrador CMS