RG aamma Polar Seafood: Inuiaqatigiinnut suliassamik neqerooruteqarpugut

Suliffeqarfiit aalisarnermik suliaqartut annersaat, Royal Greenland aamma Polar Seafood, ulluinnarni imminnut unammilleqatigiittorujussuit, immikkuullarilluinnartumik politikerinut maanna neqerooruteqarput.

Kilisaatini inuttat aqumiut amigaataalernissaasa aamma ukiuni qulikkaani imarsiornikkut ilinniartitaanermut politikkip iluatsinngitsup maanna ingerlatseqatigiiffiit taakku marluk suliamik ilisimasaniik, nutaaliornermik minnerunngitsumillu aningaasanik neqerooruteqartippai.

Qanimut suleqatigiinneq

- Tamanna aqqutissiuullugulu piviusunngortinniarlugu Imarsiornermik Ilinniarfik, Ilinniartitaanermut pisortaqarfik, minnerunngitsumillu aalisarnermik inuussutissarsiuteqartut, aningaasatigut ilisimasaqassutsimillu ullumikkumut naleqquttumik tapiisinnaasut, piaartumik ataatsimoorlutik qanimut suleqatigiiffimmik pilersitsinissaat siunnersuutigaarput. Nukiit pisariaqartitat tamaasa akuutillugit suleqatigiinnerup imarsiornermik ilinniagaqarnermi pitsaassuseq qaffassassavaa, nunatsinnilu imarsiornermik ilinniakkaminnik naammassinninnerminni uppernarsaammik allagartartaartartut amerlisillugit, inuttalerinermik ingerlatsisut Mika Heilmann, Royal Greenland aamma Jens Jørgen Egede, Polar Seafood, tusagassiuutinut nalunaarummi taama allapput.

Pisarnertut soqutigisat aammalu oqaluttuarisaaneq malillugu aaqqiagiinngissuteqartarnerup, inuiaqatigiinni piujuartussamik aaqqiissuteqarniarnerit akimmisaartittariaqanngikkaa, taakku neriuuteqarput, tamannalu imarsiornermik aalisarnermillu sulinermik tulluusimaarnermik pilersitsinermik kinguneqartitsissaaq.

Ukiut marlussuit matuma siorna Polar Seafood aamma Royal Greenland namminneerlutik nunaqavissunik kilisaatini aqumiussanik,maskinalerisunik aammalu fiskeriteknologinik ilinniartitsinermik angusaqarfiulluartussatut siunertalimmik aallartitsipput. Suliniutaasullu taakku marluk iluatsilluartussatut isikkoqarput.

- Peqqissaartumik ilinniartussarsiorneq aammalu aqumiut misilittagallit, ilinniarnerup nalaani toqqammavittut ikiortigalugit, inuusuttut arlallit maannakkut ilinniarnerminni ingerlalluarput. Taakku piginnaasaqarnertik, angusaqarususseqarnertik piumassuseqarnertillu takutereerpaat, massakkullu imarsiortutut ilinniagaqarneq Danmarkimi nunatsinnilu ingerlallualereerlugu, inuttalerinermik ingerlatsisut ilisimatitsipput, imalu naqissusiipput:

- Misilittakkat tamakku pitsaasut, siunissami aqumiunik,maskinalerisunik aamma fiskeriteknologinik ilinniartitsinermi nunatsinni aalisarnermik inuussutissarsiuteqartut annertunerusumik toqqaannarnerusumillu peqataatillugit atorluartariaqarput.

Aqumiunik amigaateqarneq

Ukiut 10-12 qaangiuppata aqumiut maanna 400-500-t pingajorarterutaasa soraarninngortussat amigaataalernissaat maanna immikkut ittumik iliuuseqarnialernermut minnerunngitsumik pissuteqarpoq.

Inuusuttut akornanni tulluusimaarnermik pilersitsinissaq Royal Greenlandip aamma Polar Seafoodip neriuutigaa, taamaalilluni amerlanerusut inuussutissarsiummi tassani ilinniarusulerniassammata.

- Tassanilu eqqaamaneqassaaq ullutsinni kilisaassuit tassaammata tunisassiorfiit teknologimik qaffasissorujussuarmik atortoqarluni ingerlatsiviit, aqumiunik sivisuumik ilinniarsimasunik, akisussaassutsimik pigisalinnik, aqutsinermut pikkorissunik allanillu piginnaasaqarnissamik piumasaqaatillit, Mika Heilmann aamma Jens Jørgen Egede allapput.

Powered by Labrador CMS