RG aalisakkat toqorarsimasut pillugit: Periuseq ajoquteqanngilaq

Saarulliit uumatitsivinni toqorarnikkut video-liarineqarnerat Facebook aqqutigalugu siaruarterneqarput tusind-ilikkaanillu takuneqarlutik. Oqallinnermi politikerit maanna akulerupput, Aalisanermut Piniarnermullu Naalakkersuisoq aaqqiisoqarnissaanut pisorlu peqqinnginnissaanut iliuuseqarnissaa noqqaassutigineqarluni.

Namminersorlutik Oqartussat suliffeqarfiutaatta saarulliit uumatitsivinniittut umiarsuarmik aalisakkanik uumatitsiviusumit sinerissami tigooraasuusarpoq.

Royal Greenlandimiillu paasissutissiissutigineqarpoq aalisakkat perlerlutik toqorarsimanngitsut suliffeqarfiullu sooq aalisakkat toqorarsimanersut maanna misissuleruttoraat erseqqissaatigalugu.

- Paasissutissat naapertorlugit oqalunnissarput pingaaruteqarluinnarpoq, tamatumunngalu atatillugu saarulliit perlerlutik toqorarsimanavianngitsut oqaatigisinnaavara. Aalisartunit nalunaarutigineqartut naapertorlugit saarulliit pisarineqarlaat pineqarput, Sten Sørensen Royal Greenlandimi saarullinnik saattuanillu tunisassiornermut ingerlatsinermi aqutsisoq erseqqissaavoq.

Imeq peqqutaasinnaasoq

Saarulliit sapaatip akunnerni arlalinni nerisaqaratik uumasinnaasut Royal Greenlandip nassuiaatigaa. Aalisakkallu sumiiffiani imeq ajornartorsiutaasimasinnaasoq oqaatigalugu.

Qassutit uumatitsiviit nunamiit sermip aaffianut iigartartumulluunniit qanippallaartumut inissinneqarsimanerat, taamaalillunilu immap qaavata imermik tarajoqanngitsumik akoqarpallaalernera saarulliit toqorarsimanerannut peqqutaasinnaasoq, tamannalu saarullinnut sunniuteqartartoq, suliffeqarfik paasissutissiivoq. Taamaammat aalisarnermi periuseq aalisakkat toqorarneranut peqquteqartinneqassanngitsoq, Royal Greenland naqissusiivoq.

- Periuseq aalisarnermi misilittarluaqqaarneqarnikuuvoq, saarulliillu sapaatip-akunnerini arlalinni nerisaqaratik uumasinnaapput. Tamanna aalisakkat toqorarsimanerannut peqqutaanngitsoq qularinngilarput. Saarulliit toqorarsimanerat nunami sermip aanneranik peqquteqarsinnaavoq, imaluunniit saarulliit bundgarniniit qassutinut uumatitsivinnut nuunneqarnerini periuseq atorneqartoq peqqutaasinnaavoq, Sten Sørensen oqarpoq.

Suliffeqarfik aalisakkat toqorarfiinni imermik tigusillutik misissuiniarput. Imermik misissuinerup saniatigut susoqarpiarsimanersoq Royal Greenlandip misissorniarpaa. Sisimiunilu aalisartut piniartullu peqatigiissiat attaveqarfigalugu paasissutissiissutigaat.

Kiassiornerit aalisakkallu amerlavallaartut

Sisimiuni Maniitsumilu aalisartut kangerlunni kiassioqattaarput. Aalisartut piniartullu peqatigiiffiani, SAPP-imi, siulittaasup Knud Mølgaardip aalisartut kangerlunni kiassioqattaarsimasut Royal Greenlandimut nassuiaatigaa.

- Kangerlunni kiarujussuaqattaarmat sermeq aangaatsiarpoq, tamannalu saarullinnut ajoqutaavoq. Tamanna qassutillu uumatitsiviit immerpallaarneqartarnerat aalisakkat toqorarsimanerinut peqqutaasimasinnaavoq. Uagut immitsinnut eqqaassagutta qassutit uumatitsiviit maajip 13-ianili immerneqarsimammata saarulliit sivisuallaamik qassutini uumatitsivimmiitinneqarsimapput. Tamanna saarulliillu amerlavallaarsimaratarsinnaanerat kiisalu erngup tarajoqanngitsup sunniuteqarnera taamak ajuusaarnartumik kinguneqarpoq. Ajuusaarnaqaarlu, Knud Mølgaard oqarpoq.

Saarulliit toqorarnerani Knud Mølgaard aamma eqqugaavoq. Taassumallu Royal Greenlandimut aamma erseqqissaatigaa saarulliit bundgarninit qassutinut uumatitsivinnut qanoq nuunneqartarnerisa misissorneqarnissaat pingaaruteqartoq.

- Saarulliit nuunneqarnerminni tuavisaartinneqarlutik uippajaartinneqarsimanersut imaluunniit nuussineq qajassuartumik arriitsumillu ingerlanneqarsimanersoq pingaaruteqartupilussuuvoq. Taamaammat silaannalersorluarnissaq eqqarsaatigalugu qassutini uumatitsivinni inissaqarluarnissaq pingaaruteqarpoq, oqarpoq, nangipporlu:

- Aalisartalerlaat periuseq ilikkaqqaartussaavaat, neriuppungalu aalisarnermi ajornartorsiutit peqatigiiffitsinnut nalunaarutigineqartassasut. Imaaliallaannaq oqaatigineqarsinnaanngimmat Royal Greenland toqqaannartumik attaveqarfigisariaqarparput. Taamaammat pisoq ajuusaarnartoq ilikkagaqarfigiumallugu suleqatigiinnissarput pingaaruteqarpoq, Knud Mølgaard naggasiivoq.

Imermik misissuisoqareerpat misissuinerillu naammassippata Royal Greenland avammut nalunaaruteqassalluni paasissutissiivoq.