unammisitsinermi ajugaasoq
Reykjavikimi una rockissaaq
Islandimiut kalaallillu Band Swapimi aaqqissuussami dommeriusut ataatsimiititat ajugaasoq toqqarpaat
Katuap ataasinngornermi Band Swapimi unammisitsinermi ajugaasut toqqarneqarput, tassanilu nipilersoqatigiit Malik toqqarneqarput.
Malik Kleist nipilersoqataalu Islandimut tusarnaartitsiartussapput - soorunalimi aamma akissarsissutigalugu.
Nipilersoqatigiit tallimat peqataarusussimasut
Malik Reykjavikimi arfininngornermi septembarip 24-ani nipilersortarfimmi Gaugurinnimi tusarnaartitsisussatut dommeriusut ataatsimiititat toqqarpaat.
Nuummi nipilersoqatigiit katillugu tallimat unammisitsinermut peqataapput.
Atuaruk: Qeqertarsuarmi kulturimut nipilersornermullu peqatigiiffik nutaaq pilersinneqartoq
Taakku nipilersoqatigiit tallimat dommerit, tassa Katuami sulisut sisamat aamma Islandip Generalkonsulatianeersut marluk saavanni nipilersoqatigiit ilisaritipput, sooq aamma toqqarneqassanerlutik oqaluttuaraat.
Maliup saqqummersitaasa aappaat ‘Ulloq Nutaaq Takkuppoq’ saqqummeqqammerpoq, assullu nuannarineqarluarpoq.
Nunat Avannarlerneersut paarlaannerat
- Assut tulluusimaarpugut, tupaqaagullu paasigatsigu uagut bandswappimut qinigaasimasugut. Islandermiut rockertissavagut pikkusutserujussuarlugit, Malik Kleist tusagassiuutinut nalunaarummi oqarpoq.
- Tupaqqangaaratta nalulerparput qanoq oqassanerluta nuannaaqaagut assut. Qujanarujorujussuaq takutitsilluaruloorumaarpugut.
Band Swap nipilersortartunik paarlaasseqatigiinneruvoq nunatta Islandillu akornanni. Oktoberimi kikkut nipilersoqatigiit Islandimiit Nuummukassanersut nalunaarutigineqassaaq.