Rektor Tusagassiornermik Nakkutilliisoqarfimmut naammagittaalliorpoq
Tusagassiutit pillugit nalunaarusiap, nutaarsiassaqartitsivimmi pisortanit isornartorsiorneqareersorlu, saqitsaassutigineqarnerani Kalaallit Nunaanni Tusagassiornermik Nakkutilliisut akulerutsinneqarput.
Ilisimatusarfimmi rektori, Gitte Adler Reimer, nittartakkap Sermitsiaq.AG-p aviisillu Sermitsiap ilisimatusarfiup tusagassiutit pillugit nalunaarutaa pillugu nutaarsiassiisarsimanerannik naammaginninngilaq, taamaatullu tusagassiornermik nakkutilliisoqarfimmut naammagittaalliuuteqarluni. Nalunaarusiaq Tusagassiuutit 2018 oktobarip 24-ani 2018-imi saqqummersinneqarpoq.
“Illuatungaannaa tusartinneqarmat”
Naammagittaalliuummini allaaserisat marluk rekrotip tikkuarpai – ”Chefredaktør: Mangelfuld medierapport” aamma ”Ejbøl: Nalunaarusiaq utertinneqartariaqarpoq” – tusagassiornermik ileqqorissaarnermut maleruutinngitsutut taallugit, tassami ”Ilisimatusarfiup isaanit illuatungaannaata tusartinneqarneratut isikkoqarmata, nalunaarusiap uterteqquneqarnera pillugu ilisimatusarfik tusarneqarsimanngimmat”.
- Nutaarsiassatut allaaserisat suliaammata, tusagassiornermi ileqqorissaarnermi maleruagassat aamma malinneqassapput, pingaartumik nutaarsiassaqartitsiviup Sermitsiaq AG sammisami immikkut soqutigisaqannguatsiarmat, Gitte Adler Reimer naammagittaalliuummini tunngavilersuivoq.
Akissut amigaatigigaa
Ilanngullugu unnersuussutigaa nutaarsiassaqartitsiviup Sermitisiaq.AG-p ”Ilisimatusarfiup akissutaa saqqummiussimanngimmagu isornartorsiummut malitsigitillugu”.
- Ilisimatusarfiup kissaatigaa Tusagassiornermik Nakkutilliisoqarfiup nalilissagaa taama suleriuseqarneq tusagassiornermi ileqqorissaarnermik maleruagassanut naapertuuttuunersoq, naammagittaalliuummi naggasiinertut allassimavoq.
Aaqqissuisuuneq nutaarsiassaqartitsivimmilu Sermitsiaq.AG-mi pisortaq, Christian Schultz-Lorentzen, tusagassiornermik nakkutilliisoqarfimmut naammagittaalliuut pillugu ima oqarpoq:
- Tusagassiornermik Nakkutilliisoqarfiup naammagittaalliuutip suliarinissaa suliamilu inerniliinissaa eqqissillunga utaqqimaassavara. Suliffeqarfik tatigilluinnartuuara.