Rekordiliisoq: 13-inik ukiulik Randi one foot high kickimi 2,14 meter angugaa
Randi Zeeb Sigurdsen Ikerasanneersoq nunatsinni one foot high kickimi rekordiliivoq. Ikerasanniit unammiaqatigiit timersuummut anersaaqarluarnerpaatut aamma toqqangaapput.
Arsaaraq amiusoq nivinngarneqarmat talini qummut siaarlugu attorsinnaanngilaa. Pissillunili nissumi illuanik tukersinnaavaa, niuminillu tukersisumik aamma natermut tussinnaalluni.
Randi Zeeb Sigurdsen, 13-inik ukiulik, nunatsinni one foot high kickimi rekordiliisutut imminut taasinnaalerpoq. Arsaaraq amiusoq 2,14 miiterisut portussusilimmiittoq Arctic Sportsimmi nunatsinni unammersuarnerni ullormi kingullermi, one foot high kickimi isimmippaa.
- Taamatut pissilinnginninni eqqarsaatigisarpara sapernanga, isimmitassara angusinnaallugu. Pissinnera iluatsimmat nuannaarpunga, pissinninni takusinnaalereeraluarakku uniulerlugu, kisianni iluatsippara, Randi Zeeb Sigurdsen Sermitsiaq.AG-mut angusani pillugu oqaluttuarpoq.
Arctic Sportsimi nunatsinni unammersuarnermi siullermeerluni peqataavoq, Arctic Winter Gamesimili peqataanikuulluni.
Timersuutit soqutigineqarluartut
Arctic Sports Ikerasammi Uummannap eqqaaniittumi, Randi Zeeb Sigurdsenip nunaqarfiani soqutigineqarluarput.
Angusallu takutippaat aallussilluartoqartoq. Randi Zeeb Sigurdsen ilanilu Arctic Sports Greenlandimit ukioq manna nersornaaserneqarput.
Kattuffiup Arctic Sports Greenlandip Ikerasammiit unammiartut timersuutip anersaavanik ingerlataqarluartutut ukioq manna nersorpai. Timersoqatigiit katillugit 353-inik pointeqarput, klubbinilu peqataasuni pointeqarnerpaallutik.
Timersuummik aallutaqarluartut
- Ikerasammiut timersuutitta anersaavanik takutitsilluarnerpaattut peqataassuni amerlanerpaannik toqqarneqarpusi. Tamatsinnut maligassiuivusi. Kattuffitsinni oqaluttuarisaanerani siullerpaallusi NUKA pissarsiarineranik pilluakulooritsi, Arctic Sports Greenlandimi siulittaasoq, Bolethe Stenskov oqarpoq.
- Ikerasammi Arctic Sports nuannarineqartorujussuuvoq. Arlallit timersuummik ingerlataqarput, aamma peqataasoqarluartarpoq. Assut nuannerpoq, Randi Zeeb Sigurdsen oqarpoq.
Randi Zeeb Sigurdsen pissinnermi unamminerni allani pingasuni aamma ajugaavoq, tassa triple jump, two foot high kick aamma kneel jump. Ukioq manna Arctic Winter Gamesimi aamma tallimanik ujaminnattaarpoq.
Arctic Sports Qaqortumi aappaagu ingerlanneqassapput.