Red Barnet: Jonna Ketwa siulittaasutut ingerlaqqissaaq
Kalaallit Nunaanni Meeqqat Ikiortigit aallartitanik ataatsimiititsinermi Jonna Ketwa siulittaasutut toqqagaaqqippoq
Kalaallit Nunaanni Meeqqat Ikiortigimi ukiumoortumik aallartitanik ataatsimiititsinermi siulersuisunut tatiginninneq tunniunneqarpoq.
Tassami siulittaasoq Jonna Ketwa siulittaasutut toqqarneqaqqippoq, tassanilu immineq kajumissutsiminnik siulersuisunut ilaasortaasut qinigaaqqipput.
- Taaneqartut suliniarnermi nukissanik tunniusuisuupput. Immikkullu nuannaarutigaarput pisortat NGO-nik meeqqat inuussuttullu sullinneranni suleqatiginnikkumallutik aggersaasarmata – tamannami pitsaalluinnartuuvoq Kalaallit Nunaanni meeqqanut iluaqusiisussaq, siulersuisunut siulittaasunngoqqittoq Jonna Ketwa tusagassiutinut nalunaarummi oqarpoq.
Suliniutit
Siulersuisuunerni issiapput: Siulittaasoq Jonna Ketwa, siulittaasup tullia Christian Witting Christensen, aningaaserisoq Katrine Olsen, siulersuisunut ilaasortaq, sinniissussaq Jesper Schrøder aammalu sinniisussaq Petrine Andersen.
- Siulersuisuunerit ulapputissaqaqaat, tassami nunatsinni ingerlanniakkat angisuut aammalu pitsaaliuinermut, qinngasaarisarnermut kinguaassiutitigullu kanngutsaaliornernut tunngasut pisussaammata. Siulersuisullu imminneq kajumissutsiminnik suleqataasut suleqatigineri nuannaarutigeqaat, taakkumi suliniarneq pisinnaalersitsimmassuk aammalu qutsavigiumavagut sumiiffinni assigiinngitsuni suliniaqatigiiffimmik tapersersuisuusut.