Rasmus Lyberth: Sulianni pitsaanerpaaq

Nuuteeqqami erinnat aamma taallat aqqaneq marluk ilaasut, Rasmus Lyberthip nammineq taalliaralugillu erinniarai. Nuuteeqqat allat saqqummersissimasaanit ilisarnaataasunit nipilersoriaaseq allaanerulaarpoq. Taallat namminermut tunngasorujussuit, ilaatigut asanninnermut, politikkimut, silaannaap pissusianut, inuunermik nuannarisaqarnermut, pilluarnermut allarpassuarnullu tunngapput.

Rasmus Lyberthip nutaaliaanerulaarnini aamma uagut inuit soqutigisarpassuagut pillugit erinarsorneri tulluarai aammalu politikkimut tunnganerulaarnini.

Silap pissusia pillugu erinarsuut ’Anoraannguummi supimmatit’ assersuutigalugu, asanninneq pillugu erinarsuut ’Asanninnvit kunia’ imaluunniit CD-mi erinaq siulleq ’Pavani’ inuunerup isumaa pillugu. Nipilersukkat nutaaliaapput rockimit aamma jazzimit isumassarsiorfiusut.

Erinnani arlalinni Rasmus Lyberthip afrikamiut nipilersortartut ukiorpaalunngortuni nipilersoqatigisarsimagai tusaalluarneqarsinnaavoq. Rytmi inissisimalluarpoq.

Erinai siulliullugit

Odensemi Nordatlantisk Husimi oqaloqatigiinnermi, Rasmus Lyberthip nipilersugaasa nutaat tusarnaarutitigut appisimaarneqarnerini, nipilersukkat ukiuni taakkunani suliarineqarsianeri pillugit inuummarilluni oqaluttuarai.

- Erinai siulliullugit suliarisarpakka. Erinnat ataasiakkaat piariingajaleraangata erinniukkap sumut ingerlaniarnera malugisarpara, taamaalilluni taallaq saqqummertarpoq. Erinnap taallallu inerikkiartinneqartarput.

- Taallaatima neriulluartuaannarnermik sammiveqarnissaat uannut pingaaruteqartuaannarpoq.

CD pitsaanerpaaq

Rasmus Lyberthip CD-liani nutaaq ’Inuunerup Oqarfigaanga’ suliamini pitsaanerpaatut toqqarnerani qulanngilaq.

- Suna tamarmi imminut tulluartumik inissippoq. Taallat. Erinnat. Nipilersukkat aqqaneq marluk tulleriiaarneqarnerat nutserneqarnerallu.

Misilittaasoqarsimanera tusaalluarneqarsinnaavoq. Nipilersortartut assigiinngitsut naggataatigut inerniliunneqartumut malunniuteqarsimanerat aamma tusaallularneqarsinnaavoq.

Nipilersukkat marluk qallunaatoortut

Rasmus Lyberthip nipilersoqatigiivisa nalinginnaasumik inissisimanerat: Jane Clark agiartoq, Alain Apaloo guitarertoq, Kristoffer Jul Reenberg nutsugiartoq, Ulrik Skytte Andersen qatitoortoq aamma Ayi Solomon percuissionertoq, CD-mi Nina Kreutzmann Jørgensenimik, tulleertutut ilaneqarput aammalu Christina Dahl saxofonertoq.

Taallat nutserneqarnerini Rasmus Lyberthip nuliani Annette Bogø Lyberth suleqatigaa. Nipilersukkat marluk qallunaatoorput.

Inuuneq nuannerpoq

Rasmus Lyberthip ukiut ingerlanerini arlaleriarluni nipilersortarfimmit tusarnaariarpassuit oqaluttuuttarpai, inuuneq nuannersoq. Oqaloqatigiinnitsinnilu taanna arlaleriarlugu oqaatigaa.

- Inuunerilersimasara qujamasuutigeqaara. Misigisarpassuaqarpunga. Saaffigineqartaqaanga, aamma inuusuttunit oqaluttuanik nuannersunik, nipilersukkakka qanoq nuannaritiginerlugit oqartarput. Soorunami tamatuma nuannaartittarpaanga qujamasutseqalungalu.

Nunarsuaq ilisimannissaaq

Rasmus Lyberth Kalaallit Nunaannut sinniisuulluartuarpoq. Rasmus Lybertheqartillugu kalaallisut oqaatsit mikinngillat.

- Sequnngeritsi, taava suna erinarsorneriga paasissavarsi, Rasmus Lyberth nipilersortarfimmit tusarnaartitsisarnerpassuarmini arlaleriarluni oqartarpoq.

Rasmus Lyberthip CD-liaa nutaaq tusarnaartillugu oqaaseq ataaseq kisimi saqqummertarpoq: Nunarsuarmi nipilersukkat.

- Kalaallit Nunaanni inuppassuarnik pitsaasunik inoqartoq, nunarsuarmi ilisimaneqassaaq. Kalaaliunera tulluusimaarutigeqaara, Rasmus Lyberthip oqaloqatigiinnerput taama naggaserpaa.

Festivalimi peqataasoq

Rasmu Lyberth Nuummi ulluni aggersuni marloriarluni tusarnaarneqarsinnaavoq. Nuuk Nordisk Kulturfestivalip ammarneqarnerani erinaq ataaseq atussavaa aamma sapaatiuppat Katuami Akisuarnerit Festivalimut atatillugu kisimiilluni tusarnaartitsissaaq.