Skip to main content

Rasmus Lyberth musikvideomik nutaamik saqqummersitsivoq

Erinarsortartoq Rasmus Lyberth sapaatip akunnerani matumani musikvideomik saqqummersitsivoq. Taanna toqusut inuunermut nutaamut pinerannut tunngatinneqarpoq.

Musikvideo nutaaq pillugu Rasmus Lyberth Sermitsiaq.AG-mit apersorneqarpoq. Nipilersuut saqqummersitaanit kingullermeersuuvoq, saqqummersitaanit 'Livet skal leves på ny' musikvideonngorlugu sapaatip akunnerani matumani saqqummiunneqarluni.

- Qatanngutikka marluk peerussimalersut, angajora aamma nukara, pillugit tunngatitaavoq. Maannakkut taakku inuunermi inutaami inuuneqarput. Qimagummata uagut inuussaagut, taamaattoq eqqarsaatitsigut najortuassavagut. Toqu akuerisariaqarparput naak imaannaanngikkaluartoq, Rasmus Lyberth oqaluttuarpoq.

Qatanngutinik annaasaqarneq Rasmus Lyberthimut imaannaasimanngilaq.

- Taamatut pisoqaraangat oqitsuinnaaneq ajorpoq. Inuunerli ingerlaqqissaaq nuannersumut. Taamatut una sanavara, oqarpoq.

Tusarnaartitseqqittalersoq

Atukkamini danskisut kalaallisullu erinarsorpoq.

- Danmarkimi maanna ukiorpassuarni najugaqarpunga, eqqarsartarnikka marluulluinnarput maannakkut, qallunaatut kalaallisullu. Tusarnaartitseqqammerpunga, danskisut aamma tassani erinnamik nutaamik erinarsorpunga. Nuanneqaaq, malugaara aamma tusarnaartut atugara nuannarigaat, oqarpoq.

Ilaquttani ilagalugit Danmarkimut nuupput ukiut 14-it matuma siorna.

- Nuukkatta anguniagaqarnikuuvunga, tassa utoqqalivallaartinnanga nipilersornikkut piginnaaneqarluartunik nipilersoqateqartalerusukkama. Imaanngilaq kalaallit nipilersornikkut piginnaaneqanngitsut, pikkorissorsuuppummi. Anguniagara angusimallugu malugaara. Ukiorpassuarni suliarisimasakka kinguneri saqqummersitanni kingullermi erserput. Pikkunartumik aallaqqaataaniit sanavara. Erinnat taallallu nukinikkiartuaartarput ilusinikkiartorlutik, ilaat sivisunerusumik sivikinnerusumilluunniit ilusinikkiartuaartarput, nukissamik tunisisarlutik, oqaluttuarpoq.

Misigisaq nassuiarneqarsinnaanngitsoq

Københavnimi tusarnaartitseqqammerpoq, coronavirusip atuutilereerneranit aatsaat tusarnaartitseqqilluni.

- Tusarnaartitsigatta aatsaat taamak tupinnartigisorsuarmik misigisaqarpunga nipilersornitta nalaani, qiiaammerlunga, pikkunangaarmat! Oqaluttuarinerluunniit ajornaqaaq. Utoqqaliartulernera malugaara, 69-nik ukioqalernikuuvunga, aamma nalunngilara taamannarsuaq erinarsorsinnaajunnaariartorlunga, nukissaqarneq utoqqalilerneralu pissutaallutik. Tusarnaartitsigatta malugaara nukissamik tunineqarlunga, waauw!, illarpoq.

Rasmus Lyberthip utoqqaliartornini akuerisimallugu oqarpoq.

- Allatut ajornaqaaq, taamaattussaavoq, inuunerup ilagiinnarpaa. Suna tamarmi killeqarpoq, akuerisariaqarlunilu. Nuannaarutissanik ulikkaarpunga. Soorlu inuusuttunit allaffigineqartarpunga uannut tupinnaannartunik, qujamasuttut. Taamaattoqaraangat nuannaarutigisaqaara, taava sinneri isumannanngillat.

Inuuimini tusarnaartitserusuppoq

Rasmus Lyberth aappaagu 70-nik ukioqalissaaq. Kulturikkut illorsuarmi Katuami inuuimini tusarnaartitserusuppoq.

- Aggutip 21-ani 70-nik ukioqalissaanga, ullormi tassani tusarnaartitserusuppunga Katuami. Inuit takkuttut qujaffigerusuppakka ukiorpassuarni tapersersorsimammannga, tusarnaariartunut festertitserusuppunga. Ilaquttakka tamarmik ilagalugit inuuissiorusuppunga, inuit tuniorartarmannga tuniserusuppunga utertitsillunga nipilersoqatigisartakkakka ilagalugit, Rasmus Lyberth oqarpoq.

Taanna Nunani Avannarlerni Siunnersuisoqatigiit nipilersornermut nersornaasiuttagaanut innersuunneqarpoq. Nersornaat oktobarip 27-ani tunniunneqassaaq.

Musikvideoliaa nutaaq uani takuuk:

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER