Anngunniunneq
Rasmus Larsen anngunniunnissamut piareertoq
Rasmus Larsenip klubbia Otterup HK Danmarkimi 1. divisionimi unammisartuusut sapaammi tupaallatitsillutik ajugaapput
Assammik arsarluni Danmarkimi 1. divisionimi unamminermi Otterup HK Team Sydhavnsøernemut unamminermi ajugaanissamut ilimagineqanngikkaluartut tupaallaataasumik ajugaapput. Team Sydhavnsøerne 1. divisionimi pingajuupput Otterup HK qulingiluaattut inisseqqallutik. Unammineq Otterup Hallernemi Fyn-imi ingerlanneqarpoq.
Unamminerup aallartinnerani tupaallannartoqarnissaa takuneqarsinnaanngikkaluarpoq, unammisut mimunneranni Team Sydhavnsøerne 11-14-imik siuaqqapput.
Rasmus Larsen muminnissamut 7 minutsiinnanngortut iserpoq, mumereernermilu 20 minutsit aamma isersimalluni. Mumereernerup kingorna unammineq allanngoriasaarpoq, Otterup HK illersuillualerput, saassussinernilu isertitsisalerlutik. Otterup 19-18-imik siuarput mumereernermi minutsit qulit ingerlareersut, Rasmus Larsen taarsertimmat 26-22-mik siuaqqallutik. Unammineq 31-26-mik naammassivoq.
Pitsanngoriartorneq
Unammineq naammassimmat Rasmus Larsenip unamminini iluarisimaarpaa.
- Pan Amerikami pissartanngorniunnissamut anngunniukkiartornissatsinnut aallannginnitsinni taama unammilluartigisinnaagama nuareqaara. Anngunniunnermut peqataanissara anguniarsimavara, tassami sungiusarnikuugama annertuumik peqataanissara anguniarlugu, Rasmus Larsen unammereernermi Sermitsiaq.AG-mut oqarpoq nangillunilu.
- Mexico Citymi unammisaqattaarnissat qilanaaraakka, nalunngilarali allaanerungaatsiarumaartoq sungiumasatsinniit. Aamma silaannaa allaanerujumaarpoq, unammisaqattaarnerit 2000 meterimi qatitsigisumi ingerlanneqassapput, tamanna unamminarumaarpoq.
Rasmus Larsen Kalaallit Nunaat nunanut allanut unammisarnissanut akuerisaammalli 101-neriarluni unammeqataareerpoq. Oktobarimi 1997-imi unammeqqaarnermi peqataanikuuvoq, katillugillu 224-riaq isertitsinikuulluni.