Rani: Atuartut atuanngitsoortartut ima ikilisinneqarsinnaapput

Meeqqat atuarfimmi peqataalluarnerulernissaa anguniaraanni atuarfimmi ataqatigiinneq pingaaruteqarpoq. Atuarneq nuannersuusariaqarpoq. Taamaanngippat atuartoq angerlarsimaannarnissamut qaninnerussaaq.

Atuarfimmi pisortaq, Rani Hørlyck, taama nassuiaavoq.

Meerarli atuanngitsuukulavallaalerpat angajoqqaat aamma naapinniarneqartariaqartut, taanna erseqqissaavoq.

Nuummi illoqarfimmi meeqqat atuarfiini ilinniartitsisut atuarfiullu pisortai augustip aallartilaarnerani pikkorissarput, atuartut atuarnerusalernissaannut isumassarsiorlutik. Nuummi meeqqat atuarfiini atuanngitsoortoqartarnerit agguaqatigiissillugu ukiumut 7,91 procentiuvoq, qallunaallu atuarfiinut sanilliullugu annertunerulaarpoq, Danmarkimi 5,9 procentimiimmat. Rani Hørlyck, Aarhusimi Søndervangskolemi ilinniartitsisut pisortaat, pikkorissaanermi saqqummiivoq.

Rani Hørlyck Søndervangskolemi ukiuni kingullerni ilinniartitsisut pisortarisimavaat. Rani Hørlyck atuarfimmi pisortanngornerata nalaani atuartut 46,8 procentii atuanngitsuukulavallaarujussuartutut nalilerneqarsimapput, taakkumi ukiumi atuarfiusup ulluisa 10 procentii sinnerlugit atuanngitsoortarsimapput. Ullumikkut atuartut ukiumi atuarfiusumi agguaqatigiissillugu ulluni aqqaneq-marlunni atuanngitsoortarput, tamanna isumaqarpoq ukiumut atuanngitsoortarnerit 6 procentit missaanniittoq.

- Atuartut atuanngitsoortarnerat annikillisissagaanni angajoqqaat peqataatinneqarnissaat pingaaruteqarpoq. Atuanngitsoortarnerit amerlavallaaleraangata angajoqqat ataatsimeeqatiserisarpagut, atuartorlu peqatigalugu iliuusissatsinnik pilersaarusiortarluta. Meeqqamut angajoqqaat akisussaasuunerpaapput, Rani Hørlyck oqaluttuarpoq. Atuarfimmi taassuma pisortaaffigisaani atuartut tamangajalluinnarmik marluinnik oqaaseqartuupput.

Ullut atuarfiusussat 200-t tamarmik pingaaruteqarput

Rani Hørlyckip pingaartilluinnarpaa ullut atuarfiusut 200-t tamarmik atuarfigineqarnissaat. Tamanna angajoqqaanut oqariartuutigineqartarpoq, angajoqqaallu atuanngiffeqarnerup avataani atuartuutiminnik atuanngitsoortitsinissamut qinnuteqaraangata, atuarfik anngaaginnarneq ajorpoq.

- Meeraq napparsimanngippat, taava atuartup atuarnissaanut kaammattuisarpugut. Allamik peqquteqarluni atuanngitsoornerit ilinniartitsisumit atuarfiulluunniit pisortaanit akuerineqaqqaartussaasarput. Atuartullu atuartuaannarnissaanut piumasaqaateqarnerput angajoqqaanit nuannarineqarluartoq maluginiarparput, Rani Hørlyck oqarpoq.

Angusarissaarnerulertut

Rani Hørlyck Søndervangskolemi pisortanngormalli atuartut ilinniartitsisullu peqanngitsoortarneri ikileriarsimapput, ilinniartitsisullu napparsimallutik sulinngitsoortarneri allaat affaannanngorsimallutik. Tamanna isumaqarpoq Aarhusimi atuarfinni ilinniartitsisuni napparsimallutik sulinngitsoortartut, Søndervangskolemi maanna ikinnerpaalersimasut.

Taakku malitsigisaannik meeqqat atuarfianni naammassisut angusaat pitsanngoriangaatsiarsimapput.

- Meeqqat atuarfianni inaarutaasumik misilitsinnerni angusat appasinnerpaaffimminniimmata 3,42-miipput. Angusat maanna agguaqatigiissillugit 6,2-miipput, nunamilu angusat agguaqatigiissinnerannit appasinnerulaaginnarlutik, Rani Hørlyck oqarpoq.

- Meeqqanut tamanut qaffasissumik anguniagassiisariaqarpugut naatsorsuuteqartariaqarlutalu. Allatummi iliorsinnaanngilagut. Naatsorsuutigut qaffasinneruppata, aamma meeqqat suliaqarneruniartarput, Rani Hørlyck nassuiaavoq.

Kommuneqarfik Sermersuumi Meeqqanut Atuarfeqarfinnullu Ingerlatsiviup innersuussutigaa meeqqat atuarnerannut digitaliusumik nalunaarsueriaaseq, Tabulex Tea, atuarfiit tamarmik atussagaat. Atuarfinnilu atuanngitsoortarnermut annikillisaanissamut anguniagassat sinaakkuserneqarnissaat kommunip isumagissavaa.