Randi: Sooruna IA-p ataatsimeersuarneranit KNR toqqaannartumik aallakaatitsiniartoq?
IA-p arfininngorpat nuna tamakkerlugu immikkut ittumik ataatsimeersuarneranit KNR-ip toqqaannartumik aallakaatitsiniarnera, Demokraatit narrujuummissutigaat, tassani partii nutaamik siulittaasumik qinersissaaq, tusagassiorfiup innuttaasunik kiffartuussisup Demokraatit ataatsimeersuarnerannit aallakaatitsinikuunngimmat.
Demokraatineersup Randi Vestergaard Evaldsenip apeqqutigaa, KNR-imi aaqqissuisut IA-p nuna tamakkerlugu ataatsimeersuarneranit tv-kkut aallakaatitsiniarnerat periuseq nutaajunersoq.
- Juunip qaammataani Demokraatit nuna tamakkerlugu Ilulissani ataatsimeersuarpugut, ilaatigut siulittaasussamik nutaamik qinersilluta. Ataatsimeersuarnerput toqqaannartumik KNR-imiit aallakaatinneqanngilaq. Aamma siuliini nuna tamakkerlugu ataatsimeersuartarnigut aallakaatinneqanngisaannarput. KNR-ip kiffaanngissuseqarluni TV-mi kanalini sunilluunniit aallakaatitassaminik aalajangersaasarnera tamakkiisumik ataqqivarput.
Attuumassuteqannginnissamut piumasaqaat
- Taamaakkaluartorli erseqqissartariaqarparput KNR aallakaatitassiornermini arlaannaannulluunniit attuumassuteqartussanngimmat. Taamaattumik KNR-p qinersinerup nalaani IA-p Siumullu siulittaasuinik immikkut oqallitsitsinissani pingaarnerutimmagu ernumaammersimaqaagut aammalu taama ernumanartigaaq arfininngorpat sunnguamilluunniit isornartorsiuinertaqanngitsumik IA-p nuna tamakkerlugu ataatsimeersuarnissaa aallakaatinnialermagu.
KNR-imi pisortap Karl Henrik Simonsenip Sermitsiaq.AG-mut ilisimatitsussutigaa, IA-p nuna tamakkerlugu ataatsimeersuartitsineranit aallakaatitsinissamik aalajangerneq, immikkut ittumik ataatsimeersuartoqalerneranik pissuteqartoq.
- Siulittaasumik qinersinermut tunngasortaannaa taamaallaat toqqaannartumik aallakaatissavarput, Karl Henrik Simonsen nassuiaavoq.
KNR-ip siorna aamma Siumumi siulittaasunngorniuulluni qinersisoqarneranit taamaaliorniarluni aalajangersimagaa taassuma ilisimatitsissutigaa. Juunimi 2017-imi Vittus Qujaukitsup Kim Kielsen siulittaasutut unammillerpaa.
Nuna tamakkerlugu ataatsimeersuarnerit tamaasa aallakaatittarusukkaat
- Partiit nuna tamakkerlugu ataatsimeersuarneri tamaasa aallakaatittarnissaat kissaatigaarput. Kisianni suli aalajangertoqanngilaq. Taamaattorli partiit tamarmik isertissalluta piareersimasarnissaat piumasaqaatigissavarput, KNR-imi pisortaq ilisimatitsivoq, tamatuma saniatigut tusagassiorfik innuttaasunik kiffartuussisoq akisusinnaanera pissutigalugu aningaasaqarnikkut misissueqqaartariaqartoq aamma oqaatigaa.