overenskomstforhandling

Randip kommunit nipangernissaannik qinnuigai

Namminersorlutik Oqartussat aamma AK-p isumaqatigiinniarnerisa saniatigut, kommunit amerlanerusunik akissarsiaqartitsinissamik oqariartuuteqarput

Pisortat suliffeqarfiinni akissarsianik isumaqatigiinninniarneq pillugu oqallinnerit Aningaasaqarnermut Aatsitassarsiornermullu naalakkersuisup, Randi Vestergaard Evaldsenip (D), ulluni kingullerni malinnaaffigilluarpai.

Akissarsiat amerlanerusut
Kommunini sulisut tigummiinnarniarlugit, Kommune Kujalleq aamma Kommuneqarfik Sermersooq atorfilinnut arlalinnut akissarsianik qaffaanissaq pisariaqarneraanikuupput.

Tamanna pillugu oqallinnermut ammasumut kommunit peqataaqqunagit, Naalakkersuisunut ilaasortaq kajumissaaruteqarpoq.

Eqqissisimatitsineq, qujanaq
- Suliffeqarfeqarfimmi isumaqatigiissutinik isumaqatiginninniartoqaraangat, isumaqatiginninniartut isumaqatigiissuteqarniarnerminni eqqissisimasariaqarput. Tunngavik tamanna aamma maannakkut AK’mi (atorfilittat kattuffiat) isumaqatiginninniarnerni ingerlasuni atuuppoq.

- Kommunit, pisortani aamma sulisitsisuusut, AK-mi isumaqatigiinniarnermut piginnaatitsissut oqaloqatigiissutigerusukkunikku, taava tamanna immikkut suliaqartussat aqqutigalugit pisariaqarpoq. Tassa Isumaqatigiinniarnernut Isumaqatigiissuteqarnernullu Ataatsimiititaliaq aqqutigalugu, tassani Kanukoka, kommunit aamma Namminersorlutik Oqartussat ilaasortaapput, Randi Vestergaard Evaldsen, tusagassiuutinut nalunaarummi naqissusiivoq.

Akuerineqareersoq
Taassuma aamma kommuninut eqqaasitsissutigaa, AK-mi piginnaatitsissut pigineqartoq, Isumaqatigiinniarnermut Isumaqatigiissuteqarnermullu Ataatsimiititaliami aamma Naalakkersuisuni suliarineqareerlunilu akuerineqareersoq.

Randi Vestergaard Evaldsenilli oqaatigaa, kommunini ataasiakkaani sumiiffimmi akissarsiat aalajangiiffigeqataanerusalernissaannut, kommunit kissaataat Aningaasaqarnermut Aatsitassanullu Naalakkersuisup tusaatissatut tigugaa. Suliarlu maannakkorpiaq Isumaqatigiinniarnermut Isumaqatigiissuteqarnernullu Ataatsimiititaliami ingerlanerarlugu, taanna ilisimatitsivoq.

Powered by Labrador CMS