Skip to main content

Randip aviisi naqqippaa

Aningaasaqarnermut aatsitassaqarnermullu naalakkersuisup qallunaat inuussutissarsiorneq pillugu aviisiat, kalaallit aningaasaqarnerat eqqornerusumik saqqummiunnissaanut naqqiiviginiarsaraa

Kalaallit Nunaat ukiut marluk pingasulluunniit qaangiuppata aningaasaqarnikkut ajalusooriaannaavoq. Qallunaat aviisiata Børsenip aasaanerani Kalaallit Nunaat pillugu allaaserinneqattaarnerani taama oqariartuuteqartoqarpoq.

Taamatut oqariartuuteqarneq aarlerinartoq, professorimik aamma Nunatsinni Aningaasaqarnermut Siunnersuisoqatigiinni siulittaasup, Torben M. Andersenip, apersorneqarneranit saqqummerpoq.

Kalaallit Nunaat allanngorfissami inissisimavoq, illuani ajortumik ingerlaneq utikaajaartoq, illuanilu aningaasaqarnermut imminut nammannerusumut saakkiartorneq, aaqqissuusseqqinnissanik annertuunik piviusorsiortunik pisariaqartitsisoq. Tamanna isumagineqanngippat kingunerissavaa, Nunatsinni aamma Nunani Avannarlerni inooriaatsip qaffasissusaasa assigiinngissusaat annertuallaalissaaq, ilinniarluarsimasullu takoriikkatsinnit annertunerusumik nunamit aallartalissapput, Torben M. Andersen Børsenimut taama oqarpoq.

Ajalusoornissamut aarlerisaarineq
Tamatuma kingorna maana nittartakkakkut oqariartuut ingasaanneqarmat, Torben M. Andersenip sakkortuumik akerlilerpaa. Taassuma taamaallaat oqaatigaa, aaqqissuusseqqittoqarnissaa ukiut marluk pingasulluunniit iluani pisariaqartoq.

Maannalu aamma aningaasaqarnermut naalakkersuisup Randi Vestergaard Evaldsenip (D) qallunaat aviisiat naqqippaa.

- Tamakkiisoq takuteqqullugu aningaasaqarnitsigut qajannaatsortagut aamma taaneqarnissaat pingaartuuvoq. Nalinginnaasumik aningaasanut inatsisini ukiumoortuni bnp 0-mit 2 procentit akornanni killilimmik amigartoortarnerit missingersuutigineqartarput, nunap karsiata naatsorsuutai malunnartumik ajunngillat. Pisortat akiitsui aamma realkredittit annerpaartaat pilersaarutit malillugit akilerneqassapput, Randi Vestergaard Evaldsen nassuiaavoq.

Aaqqissuusseqqinnerit ingerlanneqarput
Taassuma aamma uparuarpaa, aaqqissuusseqqinnernik suliaqarneq aallartereersoq. Ilaatigut soraarnerussutisiat aamma siusinaarluni soraarnerussutissiaqarnermut aaqqissuusseqqinnerup akuerineqarnerata kingorna, aammalu siusinaartumik soraarninngortut suliffeqarfinnut uterteqqinniarnerisigut.

Unammilligassalli annerpaartaraat ilinniarnermut tunngasut.

- Qaffasinnerusumik ilinniarsimassuseqalerneq siunissami pisortani aamma inuussutissarsiornermi ineriartortitsinissamut tunngavissaavoq. Tamatumanerpiarlu unammilligassat suli annertupput, Randi Vestergaard Evaldsen allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER