Randi: Naalakkersuisoqarfimmi pisortaq piginnaatinneqarsimarpasigani iliuuseqartoq
Inuussutissarsiornermut Nukissiuuteqarnermullu Naalakkersuisoqarfimmi pisortap, Jørn Skov Nielsenip kinamiut uuliasiorfiutillit "piginnaatinneqarsimarpasigani" isumaqatiginninniarfigisimammagit, Randi Vestergaard Evaldsenip (D) tupigusuutigaa.
Demokraatit, maanna naalakkersuisuusunut amerlanerussuteqartitsillutik tapersiisut, isumaqarput naalakkersuisoqarfimmi pisortaq Jørn Skov Nielsen politikkikkut piginnaatinneqarsimarpasigani iliuuseqarsimasoq.
Kinamut suliffeqarfinnik nittarsaassilluni angalaneq
Kinamut angalanermi Beijingimiinnermik nalaanni suliffeqarfinnik marlunnik ataatsimeeqateqarsimalluni, tassanilu “Kalaallit Nunaanni suliariumannittussarsiuussisarnerit uuliasiorfiusinnaanerullu periarfissai pillugit oqaluttuarsimalluni” Jørn Skov Nielsen DR-ip nutaarsiassaqartitsiviata nittartagaanut paasissutissiivoq.
DR-ip ilanngullugu allaatigaa “naalakkersuisoqarfimmi pisortaq Jørn Skov Nielsenip oqaasii naapertorlugit Kalaallit Nunaata nunataani 2021-mi uuliasiortoqarnissaanut suliariumannittussarsiuussisoqassasoq ilimanartoq” – ”akuersissutit China National Petroleum Corpip aamma China National Offshore Oil Corpip soqutigai”.
Tassunga tunngasumik Demokraatit paragraf 37 atorlugu Naalakkersuisunut apeqquteqaateqarput, Kinami ataatsimiinnermut tunngasunik paasisaqarumallutik, tassami Inuussutissarsiornermut Naalakkersuisoq ataatsimiinnissaq pillugu piginnaatitsisimagunarmat.
Uuliasiornissamut akuersissutinut amerlanerussuteqartut naaggaarput
Aningaasanut inatsisissamut 2019-imoortumut tunngatillugu nunap iluani uuliasiornermut 48 milliuunit koruuninik aningaasaliisoqarnissaannut siunnersuut pillugu Inatsisartut isumaqatiginninniarput. Apeqqummi tassani Demokraatit Inatsisartuni amerlanerussuteqartut peqatigalugit isumaqataanatik nalunaareerput.
- Taama amerlatigisunik uuliasiornissamut aningaasaliisoqarniarnera naaggaarparput uuliasiornermut tunngatillugu maannamut misilittakkatta takutereermassuk iluatsitsisoqartorsuunikuunngitsoq. Pitsaanerusunik tunngavissaqarnissarput amingaatigaarput taamatut ingerlaqqinnissatsinnut. Taannalu uppernarsaat suli ulloq mannamut takunikuunngilarput, Randi Vestergaard Evaldsen, apeqquteqaatiminut arlalinnut tunngavilersuilluni allappoq. Aatsitassarsiornermullu pilersaarutip ukioq nutaamiit atorunnaarnerani taartissaanik pilersaarutitut siunnersuummik Inatsisartut suli saqqummiiffigineqarsimanngitsut, taassuma ilanngullugu tikkuarpaa.
Ataatsimut isigalugu
- Taamaattumik ataatsimut isigalugu tupaallannarpoq Namminersorlutik Oqartussani atorfilik kiniiserit uuliamik ingerlatseqatigiiffiinik ataatsimeeqateqaqattaarmat isumaqatigiinniarlunilu naak atorfilik isumaqatigiinniarnissaamut politikerinit piginnaatinneqarsimarpasinngikkaluartoq, Demokraatini siulittaasuusimasoq allappoq.