Inatsisartut

Randi Vestergaard Evaldsenimut tatiginnikkunnaarnermik taasititsinermut amerlanerussuteqanngitsut

Akitsuutinut tunngasumut assortuussutigineqartumut suliaq pissutigalugu, IA-p aamma Partii Naleqqap Naalakkersuisunut ilaasortaq uppiseriaraluarpaat

Aningaasaqarnermut naalakkersuisoq suli Randi Vestergaard Evaldseniuvoq (D).

Ataasinngornermi Inatsisartuni ataatsimiittoqarnerani partiit illuitungiliuttut Inuit Ataqatigiit aamma Partii Naleraq, mamakujuttunut allanullu akitsuutinut tunngasup ingerlanneqarnera pissutigalugu Naalakkersuisunut ilaasortaq uppiseriaraluarpaat.

Atuaruk: Arraa! Mamakujuttunut akitsuut nutaaq kingumoortumik atuuttoq

Akiliisariaqartut
Naalakkersuisut suliamik tunuartitsipput, akitsuutillu kingumoortumik akiliutigisassanngorlugit eqqunneqartut utertinneqarnissaat kissaatigalugit, tamannalu Inatsisartut upernaakkut ataatsimiinnerminni taperserpaat.

Naalakkersuisut akiliutigineqartut utertinnissaat kissaatigaat, inatsisip kingunissaanut naliliinermi Naalakkersuisut paasissutissat atugaat kukkuneqartut paasinarsimmat.

Akitsuutit nutaat atorfilittat naliliinerannit siullermit annertunerusumik eqquipput. Tamannalu tunngavigalugu akitsuutinik kingumoortumik akiliisut tamarmik aningaasaatitik tigoqqissagaat tulluartuusoq Naalakkersuisut isumaqarput.

Atuaruk: Akitsuutinit 8 millionit koruunit pisiniarfinnut utertinneqassapput

Amerlanerussuteqanngitsut
Partiilli taakku marluk tatiginnikkunnaarnermut taasititsinermut amerlanerussuteqartitsisinnaasimanngillat, partiit naalakkersuisooqatigiit Siumut, Demokraatit aamma Atassut Naalakkersuisunut ilaasortamut tapersiimmata.

Inatsisartuni attaviitsoq, IA-mi politikeriusimasoq Naaja Nathanielsen, aamma illuatungiuliuttunit siunnersuut tapersinngilaa.

Atuaruk: Sulisitsisut mamakujuttunut akitsuutinut taarsiivigeqqupput

Powered by Labrador CMS