Randi IA-mut: Inernerit akissarsianiit qaffasissuniit naalakkersuisutullu biiliniit pingaaruteqarnerupput
Inuit Ataqatigiit siulittaasuata tulliata, Aqqaluaq B. Egedep, Demokraatit naalakkersuisoqataaleratik partiitut tapersiisutut inissiinnarnerat pillugu isornartorsiuinera, Demokraatimiit Randi Vestergaard Evaldsenip akissuteqarfigaa.
- 2018-mi ataasiaannarluta Inatsisartunut qinersivugut. Tamatumunnga pissutaavoq Demokraatit akisussaaffimmik tigusinerat, IA isumaqatiginniarnerniit qimaanerata imaluunniit aninerata kingorna, tassami isumaqaraluaramik Naalakkersuisuni siulittaasunngortitsilerlutik. Kisianni nalunngisatsituut taama pisoqanngilaq, Demokraatini siulittaasuusimasoq, Randi Vestergaard Evaldsen, tusagassiutinut nalunaaruteqarluni allappoq.
Qinersineq pitsaasuunngilaq
- Demokraatini taamani nalilerparput, nunatsinnut pitsaanavianngitsoq Inatsisartunut qinerseqqissagaluarutta. Taamaattumik naalakkersuisoqatigiit isumaqatigiissuteqarfigaagut amerlanerussusiisarniarluta. Taamaalioratta soorunami politikkimut ingerlanneqartumut sunniuteqaluarnissarput piumasaraarput. Sunniuteqarlualerpugullu aammalu naalakkersuisoqatigiinnik suleqateqarneq oqaloqatigiinnermik tunngaveqarpoq ataqqeqatigiinnermillu. Tamatuma kinguneranik Demokraatiniit pingaartitagut arlallit piviusunngortippagut.
- Allatut oqaatigalugu, nalilerparput sunniuteqarluarnerusinnaalluta naalakkersuisoqatigiinnut amerlanerussusiisartutut. Imaassinnaavoq IA-jungaanni aatsaat sunniuteqartoqarsinnaavoq Naalakkersuisut biiliani akisuumi akissarsiarissaarluni issiagaanni, kisianni Demokraatiniit uagut allatut isumaqarpugut suleriuseqarlutalu. Tamakku pingaartitarinngilagut uagut. Politikki sapinngisamik pitsaanerpaaq atorlugu inuiaqatigiit pitsaanerpaat pilersinnissaat pingaarnerutipparput. Aamma tamanna sulisssutigiuarparput ullut tamarluinnaasa. Eqqaamajuaannassavarput sooq inatsisartuni issianerluta, tassa innuttaasut sullinnissaat pillugu, imminut sullinnissaq pinnagu , Randi Vestergaard Evaldsen erseqqissaavoq.
Pissaaneqarneq pissaaneqarnerinnaq piinnarlugu
Taanna isumaqarpoq Partii Naleraq aggustimi naalakkersuisoqataajunnaarmata, IA pissaaneqarniaannarluni pissaanermik tiguseriassalluni periuseqarsimagaluartoq.
- Demokraatiniit uagut allaaneruvugut allatullu suleriuseqarluta. Politikkikkut angusaqarnissaq pingaarnerutipparput politikkittalu piviusunngortinnissaa. Aamma taamaaliortuarumaarpugut qanorluunniit IA-p siulittaasuata tullia qaputsigigaluarpat isumalioraluarpalluunniit, allappoq.