Uldumip tunuarnera

Randi: Andap aalajangernera paasinarpoq

Demokraatit siulittaasorigallagaata Randi Vestergaard Evaldsenip, Anda Uldumip politikkimit tunuarluni aalajangernera ajuusaarutigaa. Saniatigut siulittaasutut qinigassanngortinniarluni ilisimatitsissutigaa

Demokraatit siulittaasorigallagaat, Randi Vestergaard Evaldsen

Sermitsiaq.AG-p marlunngornermi ullaakkut allaaserinninnera naapertorlugu, Demokraatit siulittaasuat Anda Uldumi oktoberip naaneranili napparsimalluni sulinngiffeqareerluni, politikkimit tunuarluni aalajangerpoq.

Partiip siulittaasorigallagaa, Randi Vestergaard Evaldsen, tamanna pillugu ajuusaarpoq.

- Soorunalimi tamanna nutaarsiassatsialaanngilaq, kisianni taamatut aalajangernera paasisinnaavara, Randi Vestergaard Evaldsen Sermitsiaq.AG-mut oqarpoq.

Atuaruk: Anda Uldum politikkimit tunuarpoq

Maqaasineqassasoq
- Taanna inuk iluarineqartuuvoq, partiimilu maqaasissavarput. Inatsisartunut qineqqusaarnerup nalaani uagutsinnut tatiginninnermik takutitsinerata inuttut qanoq ittuuneranik ersersitsiinnarpoq, Demokraatini siulittaasuugallartoq oqaluttuarpoq.

Taassuma erseqqissarpaa, tamassuma Demokraatit Siumumik aamma Atassummik suleqateqarnerat allanngortinnavianngikkaa, naak siulittaasoq tunuaraluartoq.

Atuaruk: Uldum stresserluni suliunnaarallarpoq

Siulittaasutut qinigassanngortittoq
Anda Uldumip aalajangernerata kinguneraa, Demokraatit nutaamik siulittaasumik aamma siulersuisuunernik februaarip 13-ni immikkut ittumik nuna tamakkerlugu ataatsimeersuarluni taasisoqarnissaa.

Randi Vestergaard Evaldsen siulittaasutut qinigassanngortinniarluni ilisimatitsivoq.

Inatsisartunut qinersinermi kingullermi Anda Uldumi 1003-nit qinerneqarpoq.

Powered by Labrador CMS