RAL: Uuliamut aningaasanullu tapiliuttagaq qaffassaaq
Uuliamut aningaasanullu tapiliuttakkamik taaneqartartoq Royal Arctic Linep 1. apriilimit qaffanniarpaa.
Royal Arctic Linemi uuliamut aningaasanullu tapiliuttagaq 1. april qaffassaaq.
Tapiliuttagaq maanna 7,18 procentimit 8,13 procentimut qaffassaaq. Uuliap akiisa qaffakkiartuaarnera, ingerlatseqatigiiffiup tapiliuttakkamik annikitsumik qaffaaneranut pissutaavoq.
Royal Arctic Line nittartakkamini taama allappoq.
Appasinnerpaaffianiittoq
Uuliamut aningaasanullu tapiliuttagaq 2021-ip naaneraniilli appasinnerpaaffimminiinnerata kinguninnguaq, qaffariaat maanna nalunaarutigineqarpoq.
Tapiliuttagaq umiarsuaatileqatigiiffiup Kalaallit Nunaannut assartugaanut tamanut ilanngunneqartassaaq, tapiliuttagaq qaffasinnerpaaffimminiikkami siorna aggustimi 30 procentimiippoq, tamanna Ruslandip Ukrainemut sorsunnerata malitsigisaanik orsussat akiisa qaffasinnerujussuannik pissuteqarpoq.
Tamatuma kingorna Naalakkersuisut ikiorsiissuteqarput, taakku tapiliussaq 2022-p qaammataani kingullerni appariartippaat.