RAL: Suleqatigiinneq pillugu unammilleqatigiinnermut tunngasumi aalajangiineq suliassanngorteqqinneqartoq
Islandimi unammilleqatigiinnermut oqartussat Eimskip aamma Royal Arctic Linep akornanni suleqatigiinnermut akuersinerat suliassanngorteqqinneqarpoq.
Apriilip qeqqani RAL-imi pisortaq Verner Hammeken eqqissiallalluni anersaarsinnaanngorpoq: Islandimi unammilleqatigiinnermut oqartussat islandimiut Eimskip aamma RAL-ip suleqatigiinnerat kiisami akuerineqarpoq.
Kisianni maanna paasinarsivoq, Verner Hammeken suli ernumassutissaqalaarpoq. Tassami umiarsuaatileqatigiiffik Samskip aalajangiineq maalaaruteqartarfimmut maalaarutigisimavaa. RAL tusagassiuutinut nalunaarummi taama allappoq.
Eimskipimik suleqateqarneq RAL-ip Kalaallit Nunaanni pajuttuinerup allanngortinnissaanut periusissiami qitiusumik ilaavoq, taamaalilluni siunissami Danmark aqqusaaqqaarlugu pisassanngimmat. Maanna suleqatigiinnerup akuerineqarnera qularnartortaqalerpoq.
Uagut upperivarput Islandimi unammilleqatigiinnermut aqutsisoqarfik eqqortumik aaliangiisimasoq pilersaarutillu malillugit ingerlaaqatigiittalerniarnerput sulissutigissallutigu, tusagassiuutinut nalunaarummi tamanna oqaatigineqarpoq.
Sapaatip-akunneri arfinillit qaangiutsinnagit Islandimi unammilleqatigiinnermut aqutsisoqarfik akissuteqassaaq. Suliassanngortitseqqinneq maannamut RAL-ip aamma Eimskipip pilersaarutit malillugit sulinerannut malunnaateqassanngilaq.