RAL: Nunatta erfalasuanik erfalasoqarneq akisuallaarpoq
Umiarsuit nunaqarfiliartaatit nutaat sisamat nunatta erfalasuanik erfalasoqarnissaat nalunaarutigineqarsimagaluartoq, nunatta erfalasuanik erfalasoqartinneqassanngillat. Royal Arctic Linep sooq danskit erfalasuannik atuinissamut aajangersimaneq arlalinnik nassuiaateqarfigaa.
Nunaqarfiliartaatit nutaat sisamat, Siuana Arctica, Maleraq Arctica, Arpaarti Arctica aamma Tilioq Arctica nunatta erfalasuannik erfalasoqassappata akisuallaassaqaaq, Royal Arctic Linemit taamatut nassuiaasoqarpoq.
Umiarsuaatileqatigiiffik naapertorlugu pissutaasut akileraartarnermut inatsimmiillutillu DIS-imik aaqqissuussinermiipput.
- Umiarsuaq Dansk Internationalt Skibsregister-imi (DIS-imi) nalunaarsugaasimagaangat umiarsuup inuttai akileraartussaatitaaneq ajorput. Umiarsuit taamatut nalunaarsugaanerat pissutigalugu Royal Arctic Linep inuttaatitai taamaalillutik Danmarkimut akileraarneq ajorput. Nunaqarfiliartaatit Kalaallit Nunaanni nalunaarsugaasimasuuppata umiarsuaaqqani taakkunani inuttat Kalaallit Nunaannut akileraartussaasimassagaluarput, taamalu umiarsuarni allani inuttat akissarsiaannut nalimmassassappata ingerlatsineq akisunerusimassagaluarluni, umiarsuaatileqatigiiffimmit nassuiaatigineqarpoq.
Assartuinermi akigititat apeqqutaasut
Imarsiortut umiarsuarni allani inuttaqatiminnut naligiissinneqarnissaasa saniatigut, umiarsuaatileqatigiiffik akileraartarnermut allaffissornermullu aningaasartuutinik sipaaruteqartarpoq, taamalu assartuinermi akigititat appasinnerutittarlugit.
- Akileraannginnissamik isumaqatigiissuteqarsimatinnata kalaallit erfalasuannik erfalasulerneq assartuinerup akiisa qaffannerannik kinguneqassaaq. Umiarsuarnut mikinernut akileraannginnissaq periarfissaasimasuuppat ingerlatseqatigiiffiup soorunami kalaallit erfalasuat toqqarsimassagaluarpaa. Aamma umiarsuaatileqatigiiffimmut allaffissornerunermik nassataqarsimassasuuppat. Kalaallit Nunaanni ingerlatsiviuvugut, tamannalu tulluusimaarutigaarput, umiarsuaatileqatigiiffiup nittartakkamigut tamanna erseqqissaatigaa.
RAL-imi umiarsuarnut akisussaasoq Anders Bay Larsen isumaqarpoq, Kalaallit Nunaanni nunat tamalaat umiarsuaataasa nalunaarsorneqarfiannik peqanngikkallartilluta aaqqiissutitut toqqagaq illuatungeriinnut pitsaasuusoq.
Umiarsuit anginerit nunat tamalaat umiarsuarnut nalunaarsorneqartarfianni nalunaarsugaasariaqarput, niuffagiutaagamik nunanilu allani umiarsualivinnut tikittarlutik.
Aqukkuminarnerusut
- Umiarsuit erfalasup ataatsip ataaniittut aqukkuminarnerupput, umiarsuaatileqatigiiffimmullu – aammalu inuttanut – ajornannginnerusumik nikeriarsitsisinnaallutik. Aamma ilinniartunik ikisitsinissaq pisariinnerusarpoq, umiarsuaatileqatigiiffimmit ilisimatitsissutigineqarpoq.
Ilanngullugu oqaatigineqarpoq, nunaqarfiliartaatissap tullia Maleraq Arctica, upernaamut tunniunneqassasoq naatsorsuutigineqartoq, Maleraq Arctica Uummannami eqqaanilu aaliangersimasumik pajuttuusassaaq, umiarsuarlu Uummannap illoqarfittut ikinngutigisaani Helsingørimi angerlarsimaffeqassasoq.