RAL: Nassiussassat Aalborgimiit nuunneqartut
Umiarsuaatileqatigiiffimmit naatsorsuutigineqarpoq, nillataartunik assartuisarneq ullunik marlunnik sivikinnerulissasoq.
Royal Arctic Linep ukiorpassuarni ileqquusoq malillugu (LCL) nillataartunik qerisunillu Aalborgimiit Kalaallit Nunaannut assartuisarnini ukiamut unitsissavaa. LCL 'containerimit ataatsimit mikineq'.
Royal Arctic Linep usinik isumaginnittarnissaq pillugu suliffeqarfinnik marlunnik nutaanik isumaqatigiissuteqarsimavoq, taamaalilluni nassiussassat siunissami Aarhusimi tunniunneqartalissapput, tassanngaanniillu apuuffissaannut assartorneqartassallutik.
- Arhusimi umiarsualivik umiarsuaq avannamukartinnagu kingullersaalluni tulaffigineqatussaammat, sullitatta nioqqutissaatitik nillataartut assartorneqartarnerat ullunik marlunnik sivikinnerulernerat malugissavaat.
- Nioqqutissat Kalaallit Nunaannut apuunneqaraangamik nutaajunerusutut isikkoqartalissapput, tamannalumi sullitatta qangali ujartortuartarpaat, Royal Arctic Linemi CCO-mi pisortaq Niels Clemensen oqarpoq.
Tunniussisarfiit marluk nutaat
Containerit FCL - full container load) nillataartunik qerisunillu imallit Aalborgimi umiarsualivimmut suli tunniunneqarsinnaassapput.
Nassiussat ataasiakkaat (LCL) nillataartussat pillugit Frode Laursen A/S Hørningimiittoq passussisussatut isumaqatigiissuteqarfigineqarpoq, kiisalu Agri-Nordcold A/S Tilstimiittoq nassiussanik ataasiakkaat (LCL) qerisunik passussisussatut isumaqatigiissuteqarfigineqarluni.
- Frode Laursen aamma Argri-Norcold nassiussassanik isumaginnittartussaagaluartut, nassiussinissamut Royal Arctic Line suli inniminniiffigineqartassaaq, Niels Clemensen oqarpoq.
Quersuit Aalborgimut utertinneqartut
Taassuma oqaluttuaraa, qerisunik Danmarkimut nassiussiniartoqartillugu - sullitat qanoq iliorsinnaanerannut paasissutissat qanittukkut saqqummiunneqassasut:
- Kalaalimerngit qerisut Danmarkimut nassiunneqartartuupput, tamatumalu qanoq ingerlanneqartarnissaa eqqarsaatigalugu tunniussisarnissap aaqqissuunneqarnera naammassineqangajalerpoq, Niels Clemensen oqarpoq.
Nutaanik isumaqatigiissuteqartoqarmat, umiarsuaatileqatigiiffiup quersuit ilaat Aalborg Havnimut utertissimavai, Royal Arctic Linep nillataartut qerisullu ullumikkut tassunga tunniullugillu aasarpai.