RAL: Assartuinermut akigitinneqartunik qaffaanikuunngilagut
Islandimiumik Eimskipimik assartueqateqartalerneq Nuup Islandillu akornanni assartuinermut akigitinneqartut qaffasinnerulernerannik nassataqarnikuunngilaq, Royal Arctic Line sullitanut tupigusuttunut ilisimatitsivoq.
Royal Arctic Line (RAL) sullitanit saaffigineqartarsimavoq, Islandimiit Nuummut nassiussisarnerup akisunerulersimaneranik aammalu Islandimiit Nuummut nassiussisarnerup Danmarkimiit Nuummut nassiussinermiit akisuneruneranik isumaqartunit.
RAL-illi facebookini aqqutigalugu erseqqissaatigaa, ingerlatseqatigiiffiup Islandimiit Nuummut assartuisarnermi akigititani allanngortissimanngikkai.
Akigititat ukioq manna kingusinnerusukkut nalilersorneqassasut, ingerlatseqatigiiffik ilisimatitsivoq:
Kvartalit pingajuanni nalilersuisoqassasoq
- Assartueqatigiinnissamut systemi nutaaq aallartisareerpat, suna tamarmilu pissusissamisut ingerlasoq qulakkeereerutsigu aammalu Royal Arctic Linep Islandimi nammineerluni assartugassanut bookingia aallartisareerpat akinut sunniutai nalilersorumaarpagut, tassungalu allannguutissanik siunnersuuteqarluta.
- Tamannalu neriuutigaarput kvartalit pingajuata naannginnerani piumaartoq. Erseqqissaatigeqqissavarput assartuinermi akigitinneqartut 2015-imi upernaakkulli Royal Arctic Linemit allanngortinneqarnikuunngimmata, Royal Arctic Line allappoq.