RAL umiarsuarnik marlunnik atsiinissamut qaaqqusisoq
Royal Arctic Line umiarsuit nunaqarfinnut assartuisartussat Siunap aamma Maleraq Arcticap atserneqarnissaannut atatillugu umiarsualivimmi nalliuttorsiornissamut qaaqqusivoq.
Siuna Arctuca ataasinngorpat Upernavimmi atserneqassaaq, tallimanngorpallu Maleraq Arctica Uummannami atserneqassalluni.
Umiarsuit taakku nunaqarfinnut assartuisartussat marluullutik illoqarfinnit marluusunit taakkunanit ingerlaartalereerput, atsiisoqareerpallu umiarsualivinni kaffillertoqarlunilu nipilersortoqassaaq. Soqutiginnittut umiarsuarnut takornariartinneqarsinnaapput.
Royal Arctica nittartakkamini taaamut ilisimatitsivoq.
29-nik ukiulik Louise Karlsen Upernavimmi Siuna Arcticamik atsiisuussaaq. Louise Karlsen Upernavimmi januar 2021-mi umiarsualivimmi pisortatut atorfinitsinneqarnissamut ungaanut terminalimi sulisuusimavoq.
Louise Zeeb umiarsuamik nunaqarfiliartaammik atsiisuussasoq
- Kinguaariinnut akisussaaffimmik tiguserusuttunut tullernut Royal Arctic Line inissaqartitserusuppoq, taamaattumik Louise Karlsen – inooqatigisanilu ataatsimik ukiulimmik erneqartoq – umiarsuaatileqatigiiffimmi inuiaqatigiinnilu maligassiuilluartutut isigaarput, Royal Arctic Line allappoq.
78-inik ukiulik Louise Zeeb Uummannami Maleraq Arcticamik atsiisussatut toqqarneqarsimavoq.
Louise Zeeb Qaarsuni inunngorsimavoq, Uummannamilu Meeqqat Angerlarsimaffianni 1959-imili sulisimalluni. Ukiorpassuarni tunniusimalluni sulisimanerminut 2020-imi Nersornaammik sølviusumik tunineqarpoq.
- Inuttut, inuiaqatigiittut ilinniakkatigullu ineriartornermi tamatta toqqissisimaffiusumik angerlarsimaffeqarnissarput pisinnaatitaaffiuvoq. Taamaattumik nuannaarutigeqaarput Louise Zeeb Maleraq Arcticamik atsiisussatut toqqarneqarsimammat, Royal Arctic Line Louise Zeebimik toqqaasimaneq pillugu allappoq.
Upernavimmi Uummannamilu atsiinerit ualikkut marlunut pissapput.