RAL sinneqartooruteqarlunilu nutaamik kukkunersiuisartoqalerpoq
Kukkunersiuisarfik Deloitte sullittakkaminik angisuumik annaasaqarpoq, tassa Royal Arctic Linep PwC aamma Grønlands Revisionskontor siunissami kukkunersiuisartorilerniarmagit. RAL 2020-mi 2 mio. koruuninik sinneqartuulaarsimavoq.
Umiarsuaatileqatigiiffimmik piginnittut Namminersorlutik Oqartussat neqeroortitsereerlutik aalajangersimapput kukkunersiuisarneq PwC-mut aamma Grønlands Revisionskontorimut tunniunneqassasoq.
RAL ullumi ileqquusumik ataatsimeersuarmat tamanna ilisimatitsissutigineqarpoq, ataatsimeersuarneq internetsikkut ingerlanneqarpoq, internetsimut atassuserluni malinnaaffigineqarsinnaasumik.
Ukiumut angusat 2 mio. koruunit
Ukiumoortumik naatsorsuutini atuarneqarsinnaavoq, ukiumut angusat akileraarutit peereerlugit 2 millioner koruuniusut, tassa ukioq aallartimmat 25-miit 35 millioner koruunit angullugit sinneqartooruteqarnissamik naatsorsuuteqarsimanermit annikinneerarsuarnik.
Sinneqartuulaarsimanermut coronap tuniluunnera pissutaatinneqarpoq, RAL-imilu aqutsisut ukiupu affaa qaangiummat isumaqarsimagaluarput, 30 aamma 45 millioner koruunit akornanni amigartooruteqartoqassasoq. Taamalli ajortigisumik pisoqanngilaq.
- Amigartooruteqannginnerput tulluussimaarutigaarput, RAL-imi pisortaaneq Verner Hammeken oqarpoq, taassuma ukiumi naatsorsuuteqarfiusumi matumani 5-imiit 15 millioner koruunit angullugit ukiumi angusaqarnissaq naatsorsuutigisimagaluarpaa, taamaattoq tamanna qularutigisimallugu.
Akiitsoqangaatsiarneq
Umiarsuaatileqatigiiffiup akiitsui ukiup ingerlanerani annertusisimapput. Tassa 2019-imi akiitsorineqartut 556 millioner koruunit 2020-mi 924 millioner koruuninngorsimagamik. 2020-p ingerlanerani umiarsuit nutaat pingasut tunniunneqarsimapput, mikinerillu marluk septembarip qaammataani tunniunneqartussaallutik.
Verner Hammekenip erseqqissaatigaa. ukiumut angusat umiarsuaatileqatigiiffiup ukiuni arfinilinni allanngortissimanngisaanik assartuinerulersimanermit sunnerneqarsimanngitsut. Taassumali erseqqissaatigaa, ingerlatseqatigiiffik ajunngitsumik ingerlasoq, "taamaattoq ingerlatsinerulersimalluni".
Nammineq aningaasaatigisat ullumikkut 682 millioner koruuniupput.
- Kalaallit Nunaanni tamarmiusumi imaatigut assartuisarfiusussatut inuiaqatigiinni suliassavut ajunngitsumik angusaqarniarfiusumillu ingerlappavut. Suliassavut piumassuseqarluta, anguniagaarluta akisussaassuseqarluarlutalu ingerlatissavagut,Verner Hammeken oqarpoq.
Kisitsisit pingaarnerit, 2019-imi mio. koruunit ungaluusalikkat
Isertitat: 982 (970)
Aningaasartuutit: 929 (902)
Angusat ingerlatsinerminngaanneernerusut: 14 (35)
Ukiumut angusat: 2 (25)
Akiitsut katillugit: 924 (556)
Nammineq aningaasaatit: 682 (688)
Iluanaarutinit Nunatta Karsianut tunniunneqartut 2,5 mio. koruuniupput.