RAL piterartoqareersoq: Igalaat decembarip 7-iata nalaani tunniunneqarnissaat naatsorsuutigineqarpoq
Royal Arctic Linemit igalaat 120-nik amerlanerusut decembarip arfineq-aappaata missaani Tasiilamut apuunneqarnissaat naatsorsuutigineqarpoq, silali pissutaalluni ulloq taannarpiaq apuunneqarnissaat neriorsuutigisinnaannginnerarlugu.
Tasiilami septembarip qaammataani piterarmat umiatsiat illullu qaliaasa aseruatiternerisa saniatigut igalaarpassuit aserortitersimapput.
Royal Arctic Linemit (RAL) illoqarfimmi igalaat 120-nik amerlanerusut taarserneqartariaqartut eqqumaffigineqarpoq. RAL-imit ilisimatitsissutigineqarnikuugaluarpoq, ingerlatseqatigiiffimmit ukioq naatinnagu igalaanik apuussinissaq ajoraluartumik isumagineqarsinnaanngitsoq, tamatumali kingorna immikkttut ittumik iliuuseqarsimapput.
Irena Arctica igalaanik aallaqqaammut assartuitinneqartussaasimagaluarpoq. Ingerlatseqatigiiffimmit nittartakkakkut maanna ilisimatitsissutigineqarpoq, usit taama killeqartigitillugit ingerlatsinermut tunngatillugu tamanna pisinnaanngitsoq, taamaattumillu umiarsuaqaqqinnissaa Nanoq Arcticamik maanna pisussanngortoq, tassa umiarsuaq Nuummiit Tasiilaliartinneqartussanngortoq.
RAL-imit umiarsuup Tasiilamut qaqugorpiaq tikinnissaa oqaatigineqarsinnaanngilaq. Tamatumunnga pissutaavoq ukiup taamaalinerani silap allanngorartarnera, ingerlatseqatigiiffimmit oqaatigineqarpoq.
Naatsorsuutigineqarporli umiarsuaq decembarip sisamaani Nuummiit aallassasoq. RAL-imit neriuutigineqarpoq, umiarsuaq decembarip arfineq-aappaata missaani Tasiilamut apuussinnaassasoq.
Taarmiusut
Kommuneqarfik Sermersuumi Tasiilamut atatillugu pisortap Hjørdis Vibergip ilisimatitsissutigaa, igalaat aserortitersimasut qisunnik ulissuarnillu matoorneqarsimasut.
Michael Waaentzip Iserimmi sarnaartornermi teknikeqarfimmi pisortap itisiliilluni oqaatigaa, krydsfineriunerusunik igalaat matoorneqarsimasut. Inuit sakkortunerpaamik eqqugaasimasuni najugallit igalaat aseruatitermatali seqinermik takorpiarsimanngillat: - Annertunerusumik annikinnerusumilluunniit taarmiupput, taanna oqarpoq.
Hjørdis Vibergip oqaatigaa, tulliani piterartoqarnissaanut piffissaq apeqqutaaginnartoq:
- Atortussat illoqarfimmut apuunneqarnissaat pingaaruteqarpoq, igalaat iluarsineqartariaqarmata - tullissaanillu pisariaqartitsisoqalissappat - kingoraartissanut toqqorsiveqartoqartariaqarluni.