RAL nunami maani assartuinermut akinik affaannanngortitsisoq
Royal Arctic Line umiatsianik, biilinik sanaartornermilu maskiinanik Nunatta iluani assartuinermut akigititaminik aqangu sisamanngornermiit atuutilersussamik appaavoq. Assersuutitut taaneqartut 50 procenti sinnerlugu akikinnerulerlutik.
Maniitsumi najugaqarluni Qaqortumi umiatsiamik pisiaqarsimagaanni, umiatsiarlu RAL-imut assartortinniaraanni, nassiunneqarnissaa aqangumut utaqqissunneqartariaqarpoq.
RAL-immi oktobarip 15-anit aallartittumik biilini, umiatsianik sanaartornermilu maskiinanik assartuisarnini akikilliniarpaa.
Assersuutigalugu umiatsiamik mikinerusumik umiatsiaaqqamilluuniit Qaqortumiit Maniitsumut assartuisitsineq ullumikkut 10.100,80 koruuninik akeqarpoq, akigititassalli nutaat malillugit assartuisitsineq 6.057, 45 koruuneqalissalluni.
Ilippanaatillit nutaat
RAL-imi tuniniaanermut nittarsaassinermullu pisortaq Lars Borris Pedersenip Sermitsiaq.AG-mut oqaluttuaraa, inuit umiatsiassaannik biilissaannillu assartuisarnermi suliffeqarfik imatorsuaq suliaqarneq.
- Soorunami neriuutigaarput, akit appasinnerulernerisigut nutaanik kaaviiaartitaqalersinnaanerput, taakkunanngami assartuisarnitsinni kaaviiaartitaqarpallaarneq ajorpugut, taamalu annaasaqarpallaarnaviarata, taanna oqarpoq.
Assersuutitut akigititassat:
Assaassuteeqqap Upernavimmit Innaarsunnut assartorneqarnera siornatigut 23.778,35 koruuneqarsimasoq, maanna 11.085,60 koruuneqalerpoq
Kussiuutip anginerusup Qaqortmiit Uummannamut assartorneqarnera 121.674 koruuneqarsimasoq, maanna 54.711 koruuneqalerpoq
Biilip 4 meteri sinnerlugu angissusillip Nuummiit Ilulissanut assartorneqarnera 19.314 koruuneqarsimasoq, maanna 11.707 koruuneqalerpoq
Nunamut nunamiillu nunarsuup sinneranut assartuisarnermi akigititaq apparneqassangaluarpat allarluinnarnik kinguneqassangaluartoq, pisortaq erseqqissaavoq.
- Danmarkimut assartuisarnermi akigititaq apparneqartuuppat ingerlaannartumik aningaasatigut malunniutissangaluarpoq. Piffissalli aggersup ingerlanerani Islandimiit Kalaallit Nunaannut assartuisarnermi akigititap apparneqarnissaa sulissutigaarput, taanna oqarpoq.
Ilaatigut tamatuma pisiniarfiit iluaqusissavai, pisiniarfiimmi Islandimut pisiniarnerusalersimapput.
DHL-imik suleqateqarnerup akilissagaa
Akinik appaaneq Islandimiit Danmarkimut assartuisarnerup DHL-imillu suleqateqalernerup nutaap akilissavaat, Lars Borris Pedersen ilisimatitsivoq.
RALimit neriuutigineqarpoq, sanaartornermi maskiinanik assartuinermut tunngatillugu sanaartornerup iluani suliffeqarfiit illoqarfigisamik avataani suliassanut neqerooruteqarsinnaalissasut, tamannalu unammilleqatigiinnikkut akinik pitsaanerusunik kinguneqarsinnaassasoq, sanaartortitsisumut inuiaqatigiinnullu iluaqutaasussamik.
- Assersuutigalugu najukkami sanasoq kisimi Tasiilami neqerooruteqartarsinnaavoq. Taamaalillunilu sanasup akigititassani nammineq aalajangersinnaallugu, Lars Borris Pedersen oqarpoq.
- Sineriammi sanaartugassanut neqerooruteqartoqarpallaarneq ajorpoq. Neqerooruteqartartut akigititanik appaanermik kinguneqartussamik amerlanerusuuppata pitsaassangaluarpoq. Taanna itisiliivoq.
Assartukkanut qulaani taaneqartunut akitigut appaaneq 2020-mi oktobarip 15-iani atuutilissaaq 2022-llu naanissaata tungaanut atuukkallassalluni, RAL ilisimatitsivoq.