RAL: Kalaallit Nunaannut pitsaanerpaasussamik iliussaagut

Nunarsuaq tamaat niueqatiginerulerlugu aamma Danmarkimut attuumannginnerulerneq. Royal Arctic Linep iliuusissatut pilersaarutaa nutaaq taama eqikkarneqarsinnaavoq.

Pilersaarutillu tamatuma kinguneraa, Aalborgip umiarsualivia ukiut pingasut qaangiuppata avaqqunneqartalernissaa.

Atuaruk: RAL-ip Aalborgimi umiarsualivimmik suleqateqarnini taamaatippaa

- Islandimiunik Eimskipimik ukioq manna maajimi isumaqatigiissuteqarnitsinnut una aalajangiineq toqqaannartumik ilassutaavoq, RAL-ip pisortaanera, Verner Hammeken nassuiaavoq.

Atuaruk: Royal Arctic Line: Kisermaassiunnaarneq akikinnerulersitsissaaq

Rotterdam aamma Aarhus
Eimskipimik isumaqatigiissuteqarnerup nassataraa, taakku ingerlatseqatigiiffiit marluk umiarsuit anginerusut ilaat inissat atorluarniarlugit avinneqartarnissaat. Kisianni pingaarnerpaartaraa, Royal Arctic Line nunani tamalaani Eimskipip angalaneranut ilanngunneqarnera, taamaalilluni nunarsuarmi tamani niuernermut ammaanneqarluni.

Nioqqutissanut eqqussinermut aamma avammut niuernermut tunngatillugu, Verner Hammeken periarfissanik annertuunik takuvoq. RAL-ip avammut niuerfigisaata kingunerissavaa, nioqqutissat Kalaallit Nunaanni suliareqqaarneqaarneqarnerulernerat, kingornalu nunarsuup sinneranut nassiukkuminarnerulernissaat.

Atuaruk: RAL-ip Eimskip umiarsuit nutaat pillugit suleqatigaa

Nioqqutit akikinnerusut neriuutaasut
Nioqqutissanik eqqussuinermut tunngatillugu, Kalaallit Nunaat Danmarkip nioqqutissaataanik pisariaqartitsitsinnginnerulissaaq.

- Savalimmiuni assingusumik iliortoqarmat qanoq pisoqarnersoq takuarput. Tassani danskit nioqqutaat 90 procentinit 60 procentinut appariarput, taanna nassuiaavoq. Taassuma piffissaq ungasinnerusoq eqqarsaatigalugu atuisut akinik appasinnerusunik nunarsuarmilu allanit toqqagassanik iluaqitserneqarnissaa neriuutigaa.

Atuaruk: Royal Arctic Linemi soraarsitsiortornissanik aarlerisaarisoq

Royal Arctic Line Nuummit Reykjavikimut aallartalernissaa tassani pilersaarutaavoq. Tassanngaanniik Eimskip peqatigalugu Hollandimi Rotterdanmimut ingerlaqqittoqartassaaq.

Rotterdam Europami containerinut umiarsualivinni annersaavoq, taamaalillunilu nunarsuup sinneranut ammaassisuulluni. Danmarkimi Aarhusip umiarsualivia atorneqartassaaq.

Isumaqatigiissut isumaqatiginninniutigineqassaaq
Aalborg Havn A/S-ip illuatungeriit isumaqatiginninniannginerini nalunaaruteqarsimanera, Verner Hammekenip paamitsaatigalugu isertuutinngilaa. Aalborgimi umiarsualiviup RAL-imik isumaqateqarnerup 2022-mut ingerlanissaa aalajangiusimavaa. Ingerlatseqatigiiffinni siulersuisuni siulittaasut uani qaammammi pilersaarut malillugu ataatsimiissapput.

Kalaallit Nunaannut iluaqutissaq
RAL-ip Aalborgimi sulisuni 2019-ip kingorna suliffeqarfimmi suliunnaareersimassasut nalunaarfigereerpai. Verner Hammekenip oqaatigaa, soorunami taakkununnga pineqartunut pisoq nuannerpallaanngitsuusoq, kiisalu Aalborgimi nutaarsiassatsialaanngitsoq.

Taassumali naqissuserpaa, ukkatarisaa allami inissisimasoq.

- Aalajangiinissat Kalaallit Nunaannut pitsaanerpaasut toqqassallugit pisussaaffeqarpugut, RAL-ip pisortaanera oqarpoq.