RAL isornartorsiorneqaqqittoq: Atuisut namminersortut nassiussat isumagisariaqartarpaat

Royal Greenlandip atuisutik namminersortut isiginiarsimanngilaat, biilileriffimmi Nuuks Automi sulisut taama isumaqarput

Atuisut namminersortut Nuummi talittarfimmut nutaamut nassiussanik aallertarneq ilungersunartippaat.

Tassami talittarfimmi nutaami tunniussisarfiit biilinut minnerusunut portuallaarput, atuisullu namminersortut imaluunniit suliffeqarfiit truckeqanngikkunik, nassiussat nammineq usilersortarfimmut qaqissinnarlugu biilinut aqqartariaqartarpaat.

Tamannalu biilileriffimmi Nuuks Automi sulisunut pakatsinartorujussuuvoq.

200 kilo tikillugu kivinneqartartut

- Sapaatip-akunneri tamaasa nassiussat annertuut nammineq kivitassagut nassiullugillu tigusarpagut. Taakkulu inuit marluk kivitassaat 200 kilo tikillugu oqimaassuseqarsinnaasarput. Royal Arctic Linep atuisunut namminersortunut tunniussisarfiit aallertarfiillu minissimagaat isumaqarpugut, Salik Bianco Jeremiassen aamma Minou Steenholdt Broberg oqarput.

Talittarfitoqqami kiffartuunneqarnertik pitsaanerusimasoq, taakku isumaqarput.

- Usilersorfiit portunikuunngillat, atuisullu RAL-imit truckinik ikiorneqartarput. Kisianni maanna truckeqanngilaq, usilersuisarfiillu lastbilinut angisuunut kisimi sanaajupput. Biiliinnaqaraanni usilersuisarfiit anguneqarsinnaanngillat, tassanilu nassiussat nammineq tunniullugillu aaneqartussaapput, Nuuks Automi sulisut oqaluttuarput.

Atortorissaarutinik pitsaanerusunik ujartuisut

Taamaattumik umiarsuaatileqatigiiffik atortorissaarutinik biiliinnarnit atorneqarsinnaasumik sanatitsissasoq, taakku neriuuteqarput:

- Atortorissaarutinilluunniit sanasoqarsinnaavoq, atuisut taamaalillutik tunniussisinnaaniassammata. Royal Arctic Linemit iliuuseqartoqarsinnaassasoq neriuutigaarput, Salik Bianco Jeremiassen aamma Minou Steenholdt Broberg oqarput.

Powered by Labrador CMS