RAL-ip umiarsuaataa sikorsuit pissutigalugit ingerlariaqqissinnaanngitsoq
Malik Arctica Ittoqqortoormiit eqqaanni sikorsuit pissutigalugit ingerlariaqqissinaanngilaq. Ukiornissaanut peqqumaatissat ulluni qaninnerni nunamut niuneqarnissaat qulakkeerniarlugu sulissutigineqarpoq, Royal Arctic Line ilisimatitsivoq.
Royal Arctic Linep umiarsuaataa Malik Arctica Ittoqqortoormiit eqqaanni sikorsuarni ingerlaqqissinnaajunnaaqqavoq.
Umiarsuaatileqatigiiffik Namminersorlutik Oqartussanit pigineqartoq taamatut Facebookikkut ilisimatitsivoq.
- Ukiornissaanut peqqumaatissat ulluni qaninnerni nunamut niuneqarnissaat qulakkeerniarlugu Royal Arctic Line, KNI, Arktisk Kommando aamma DMI qanimut suleqatigiipput, umiarsuaatileqatigiiffik allappoq.
Umiarsuaatileqatigiiffik naapertorlugu, umiarsuup ingerlaqqissinnaanissaa sulissutigineqarpoq, sikoqarpallaarnerali maannakkorpiaq unammillernartinneqarluni:
Inuttat ulorianartorsiunngitsut
- Umiarsuaq inuttallu navianartorsiunngillat. Pisariaqartitsisoqalissagaluarpat sumiiffimmi isumannaallisaaneq annertusarniarlugu atortunik sumiiffimmukaassinissaq pillugu Issittumi Sakkutooqarfik qanimut suleqatigineqarpoq, Royal Arctic Line allappoq.
Umiarsuaatileqatigiiffiup ukiornissaanut peqqumaatissat Ittoqqortoormiinut anngunneqarnissaat sulissutigaa
- Royal Arctic Linellu sikoqassuseq pitsanngoriarpat tamatuma qulakkeerniarnissaa pillugu DMI-p sikunik alapernaarsuisui aamma KNI qanimut suleqatigai. Sikoqassutsip ullut marlussuit iluanni pitsaanerulernissaa naatsorsuutigineqarpoq. Sumiiffimmullu ukiornissaanut peqqumaatissat qulakkeerneqarnissaat siunertaralugu taamatut inissisimasoqarnera illuatungeriinnit tamanit malittareqqissaarneqarpoq, umiarsuaatileqatigiiffik allappoq.
Royal Arctic Line aqagu sisamanngornermi nal. 12:00 paasissutisseeqqissaaq.