RAL-ip umiarsuaata Sydpolimi ilisimatuut pilersussavai
Mary Arctica qaammatini tulliuttuni Norgemiut ilisimatuut misissuisarfiannut Troll I Antarktisimut pilersuilluni angalassaaq
Mary Arctica maannakkut Aalborgimi Grønlandshavnemi talinngavoq, inuttallu umiarsuaq Qalasersuaq Kujallermut angalanissaanut piareersaleruttorpaat.
Decembarip aallartinnerani umiarsuaq Antarktisimut aallassaaq, tassani Norgemiut ilisimatuuisa misissuiaarfiannut Trollimut nassiussanik angallassisoqassaaq. Mary Arctica suliassamut Norsk Polarinstituttimit attartorneqarpoq.
Suliassaq tulluusimaarutigigaat
- Ukiorpassuarni umiarsuaatigut Antarktisimut angalatittarpagut. Tamanna Kalaallit Nunaannut angalasarnitsinnut tulluarpoq, ukiuunerani nassiussat ikinnerusarmata. Antarktisimi suliassatta suliarinissaa tulluusimaarutigaarput, tamanna misilittakkatsinnut tulluarmat, senior director Anders Bay Larsen, Royal Arctic Linemeersoq oqaluttuarpoq.
Qalasersuaq Kujallermut angalanissami Mary Arctica Sydafrikami Capetownimut aqqusaassaaq, tassani inuttanik paarlaattoqassaaq.
Ilisimatuut misissuisarfiat Troll, Dronning Mauds Landimi Antarktisip ilaani, Atlantikup kujataani inissisimavoq. Misissuisarfik 400 m2-nik angissuseqarpoq, inunnullu 20-nut inissaqarluni.
- Trollimut nassiussat sioqqullugit Mary Arctica aamma atortunik nassataqassaaq, taakku Norgemiut umiarsuaannit Kronprins Haakonimit sikumit aserorterummit ilisimatuut misissuisarfiannit atorneqartussanik, taanna Wedellshavetimi Dronning Mauds Landip avataani krillinik aamma uumassusillit assigiinngissusaannik misissuisussaavoq, Kim Holmén oqarpoq.
Mary Arctica marsip aallartinnerani Aalborgimut tikeqqinnissaa naatsorsuutigineqarpoq.