RAL-ip tapiliuttagaq apparpaa – ikiorsiissut atorunnaassaaq

Uuliamut aningaasallu nalinginut tapiliuttagaq Royal Arctic Linep maanna apparsinnaanngorpaa, uuliap akiata apparnera pissutigalugu. Naalakkersuisut ikiorsiissutaata atorunnaartussanngornera peqatigisaanik aappaaneq pivoq. Ikiorsiissutit sivitsorneqassanersut maanna isumaliutigineqanngilaq, naalaakkersuisoq ilisimatitsivoq.

Uuliap akiisa aningaasallu nalingisa appariartornerat pissutigalugu Royal Arctic Linep uuliamut aningaasallu nalinginut tapiliuttagaq 2023-mi januaarip aallaqqaataanit atuutilersumik 13,47 procentinut appartissavaa. Umiarsuaatileqatigiiffik Namminersorlutik Oqartussanit pigineqartoq nittartakkamini taama ilisimatitsivoq.

Tapiliuttagaq qaffasinnerpaagami aggustimi 30,73 procentiuvoq, tamannalu Nunatsinni atuisunut akit qaffakkiartornerannik kinguneqarpoq.

Taamatut ineriartortoqarnerani Naalakkersuisut septembarip naanerani ikiorsiissuteqarneranik kinguneqarpoq, aningaasat nalinginut tapiliuttakkagaq ukiup qaammataani pingasuni kingullerni appartinneqarpoq.

Sivitsorneqarnissaa oqaluuserineqanngitsoq

Ikiorsiissutit 31. decembarimi atorunnaassapput, taamaattumillu uuliamut aningaasallu nalinginut tapiliuttagaq avannamut, kujammut sinerissamilu assartukkanut assigiimmik annertussuseqaqqilissaaq, RAL ilisimatitsivoq.

Uuliamut aningaasallu nalinginut tapiliussat appariaataat

1. novembarimit uuliamut aningaasallu nalinginut tapiliussat imaapput:

Avannamut assartukkat kiassutsimik nalunaarsorneqartut 0%

Avannamut assartukkat allat 14%

Kujammut sineriammilu assartukkat 20,20%

Najoqqutaq: ral.gl

Ikiorsiissutit 30 millionit koruuninik aningaasaliiffiusut sivitsorneqarnissaannut maannamut oqaluuserinnittoqanngitsoq, aningaasaqarnermut naalakkersuisoq, Naaja H. Nathanielsen (IA) Sermitsiaq.AG-mut ilisimatitsivoq.

Sumiiffinni sikoqarfiusuni sikuerunnissaata tungaanut ikiorsiissut akinik nioqqutissallu nutaat tikinnissaannut qulakkeerinnissimasoq, naalakkersuisup oqaatigaa:

RAL januaarimi nalunaaruteqassaaq

- Aaqqiissummi aalajangerneqartumi taakku pingaarnerit ilagaat. Ikiorsiissutit annertussusaat atorneqarnerallu pillugit RAL januaarimi nalunaaruteqassaaq. Tamatuma kingorna Naalakkersuisut nalunaarut misissussavaa, peqatigisaanillu akit aningaasarsiornikkullu pissutsit allanngorarnerat misissussagaat, Naaja H. Nathanielsen allagaqarluni akissuteqarpoq. Naalakkersuisut ineriartornermik malinnaasut taassuma oqaatigaa:

- Taanna tikitsinnagu annertuumik pisoqarpat, imaluunniit ineriartorneq siulittorneqarsinnaanngitsoq pissappat, soorunami misissussavarput.

Umiarsuaatileqatigiiffiup uuliamut aningaasallu nalinginut tapiliussaq iluanaaruteqarfiunngitsoq, taamaallaallu ingerlatseqatigiiffiup uuliap akiinut aningaasallu nalinginut aarlerinartunut qulakkeerinninnermut atorneqartoq, Royal Arctic Linep naqissuserpaa.

Powered by Labrador CMS