Royal Arctic Line
RAL-ip qarasaasiatigut ajornartorsiutai suli qaangiutinngitsut
Qarasaasiatigut ajornartorsiuteqarneq suli aaqqiissuteqarfigisimanagu, Royal Arctic Line-p nassuerutigaa, tamanna inuussutissarsiutilinnut millionilikkuutaanik akeqarsimavoq. Apeqqutaalerporli, Naalakkersuisut umiarsuaatileqatigiiffup aqutsisuinut naammagittaannarsinnaanersut, kinguneqartitsiniarnersulli.
Royal Arctic Line-p qarasaasiatigut ajornartorsiuteqarnini, suli aaqqiissuteqarfigisimanngilaa, umiarsuaatileqatigiiffiummi upernaarli pisussaaffiminik naammaginartumik naammassinnissinnaasimanngilaq, tamannalu inuussutissarsiuuteqarfinnut millionilikkuutaanik annaasaqarfiuvoq.
Siusinnerpaamik martsimi
Qarasaasiatigut ajornartorsiutinik aaqqiissuteqarnissaq siusinnerpaamik martsip qaammataani pisinnaanera ilimanaateqarpoq.
- Qarasaasiatigut ajornartorsiutinut atatillugu systemip pitsanngorsarnissaa ilungersuullugu sulissutigaarput, tassungalu atatillugu pitsanngorsaat martsip qaammataani pisinnaanissaa naatsorsuutigaarput, Royal Arctic Line-mi pisortaanerup tullia, Taitsiannguaq Olsen, Sermitsiaq.AG-mut oqarpoq.
Taassuma aammattaaq oqaluttuaraa, it-systemimut atuisut pikkorissartinneqarnissaaq ukioq manna 1. kvartalimi pilersaarutigineqartoq.
Naalakkersuisoq pakatsisittariaqaraa
Umiarsuaatileqatigiiffiup ajornartorsiutiminik aaqqiissuteqarsinnaannginnera, Attaveqatigiinnermut Naalakkersuisup Erik Jensenip pakatsissutigisimassavaa.
Oktobarip qaammataani Erik Jensenip Verner Hammeken ataatsimeeqatigaa, ataatsimiinnerullu kingorna Erik Jensen erseqqissaavoq ukioq nutaaq aallartinnagu ajornartorsiut aaqqiissuteqarfigineqassasoq.
Oktobarip qaammataani Sermitsiaq.AG-p Erik Jensen ima apeqquteqarfigaa:
Taava umiarsuaatileqatigiiffiup ukioq nutaaq aallartinnagu ajornartorsiutiminik aaqqiissuteqassappat ajorissanngiliuk?
Taamani Erik Jensen ima akissuteqarpoq:
- Taama sivisutigisumik utaqqinavianngilanga. Qaammatit arlallit ukiullu affaa eqqartunngilagut. Umiarsuaatileqatigiiffik ukioq nutaaq aallartinnagu ajornartorsiutimik aaqqiissuteqarnissaa naatsorsuutigaara, Erik Jensen ulloq 23. oktober oqarpoq.
Aqutsisunut kinguneqartitsineq
Umiarsuaatileqatigiiffiup nutaamik nalunaaruteqarneratigut aqutsisunut kinguneqassanersoq piffissap takutissavaa. Erik Jensenip suliaq "ilungersuumminartutut" isigalugu Sermitsiaq.AG-mut paasissutissiarisimavaa, tassani suliffeqarfik avammut niueruteqartartup Islandimi isertitassaraluani millionit sisamararterutaat annaasimavai, taamaammaammallu taanna ataatsimeeqateqarnissamik piumasaqarsimavoq, umiarsuaatileqatigiiffiullu pisortaaneranit Verner Hammekenimit nassuiaanneqarumaluni.
Aamma atuaruk:
Læs også: Naalakkersuisoq skrider til handling i RAL-sag
Erik Jensenilu Royal Arctic Line-mi aqutsisunut toqqaannartumik akisussaasuunngilaq. Namminersorlutimmi Oqartussat ingerlatseqatigiiffiutaat siulittaasup naalakkersuisoqarfiata ataaniipput Kim Kielsen politikkikkut akisussaasutut inissisimalluni.
Politikkikkut tatigineerussinnaaneq
Erik Jensen politikkikkut tatigineerutissanngikkuni, RAL-p ajornartorsiutai pillugit Naalakkersuisunut saqqummiuttariaqalissavai. Apeqquterujussuuvormi, Naalakkersuisut umiarsuaatileqatigiiffiup aqutsisuinut naammagittaannarsinnaanersut.
Umiarsuit kinguaattoorneri
Kinguaattoornerillu umiarsuaatileqatigiiffimmit aamma ajornartorsiutigineqartut pillugit, pisortaanerup tulliata paasissutissiaraa, angummanniarneq aamma sulissutigineqartoq.
- Malik Arctica decembarip qaammataaniilli silarlunnerup kingunerisaanik, immikkut Upernaviliartiinneqarsimanera kiisalu umiarsuarmi teknikkikkut ajornartorsiuteqarneq kinguaattoorneranut pissuteqarpoq. Taamaakkaluartoq umiarsuarmut taassunga kinguaattoorneq una qaammat naatinnagu angummaffiginissaa naatsorsuutigaarput, Taitsiannguaq Olsen Sermitsiaq.AG-mut paasissutissiivoq.