RAL-ip qaqagu Eimskip-imik assartuinermi suleqateqalernissaa aalajangerneqarpoq
Royal Arctic Line Eimskip-imik juunip naaneranit suleqateqalissasoq pisortaanerup Verner Hammekenip ilisimatitsissutigaa
Pissutsit assigiinngitsut pissutaallutik Royal Arctic Linep aamma Eimskipip suleqatigiilernissaat kinguarteqattaarnikuuvoq.
- Eimskipip umiarsuassani siulleq tiguaa sapaatip akunnera kingulleq. Assartuinermi suleqateqalernissaa kvartalip aappaani pisinnaalissasoq qularutiginngilara, Verner Hammeken Sermitsiaq.AG-mut oqarpoq.
Assartueriaatsit assigiinngitsut saqqummiunneqarumaartut ilisimatitsissutigaa.
Suleqatigiittoqalerpat umiarsuit ukunani sumiiffinni tulattalissapput: Nuuk, Reykjavik, Aalborg, Aarhus, Helsingborg aamma Frederiksstad.
Polenimi tulattalernissaagaluaq taamaatiinnarneqarsimasoq ilisimatitsivoq.
- Aalborgiliarsinnaatilluta tamanna periarfissaassanngilaq. Isumaqatigiissutit pissutaallutik tamanna 2022-it naaneranit aatsaat pisinnaavoq, oqarpoq.