RAL-ip pisortanik sisamanik pisortaqatigiit ilagai
Umiarsuaatileqatigiiffimmi qullersat assigiinngisitaartuunerat tamatuma qulakkeerlugulu ingerlatseqatigiiffik siunissami suliassarilerumaagaatigut nukittunerusumik inissisimatilissavaa.
Namminersorlutik Oqartussat umiarsuaatileqatigiiffiutaanni siulersuisut aalajangersimapput pisortaqatigiit annertusiniarlugit, ingerlatseqatigiiffik nittartakkamigut ilisimatitsivoq.
Assartueqatigiittarnermi Royal Arctic Linep Islandimiumik Eimskipimik suleqateqarluni pilersissimasaani periarfissat pitsaanerusumik atorsinnaaniarlugit taamatut aaqqiisimapput. Pisortaqatigiinnilli annertusaaneq umiarsuaatileqatigiiffimmut qanoq akeqassanersoq allassimanngilaq.
- Siulersuisut pisortaqatigiit annertusarnissaannik aalajangiipput ingerlatseqatigiiffiup attaveqatigiinni ammasuni siunissami suliassarilerumaakkaminut nukittunerusumik inissisimanissaa anguniarlugu.
- Pisortaqatigiit amerlassutsimikkut kikkunnillu inuttaligaanermikkut allanngortinneqanngillat, allannguinerli ingerlatseqatigiiffiup pitsaasumik ineriartornerata ingerlatiinnarsinnaanissaanut annertuumik sunniuteqassaaq, siulersuisut siulittaasuat Ulrik Blidorf oqarpoq.
Pisortaaneq: Ataatsimoornissaq qulakkiissavaa
Pisortaqatigiinni ilaasortat nutaat tassaapput:
- Umiarsuarnik ingerlatsinermut pisortaq: Anders Bay Larsen
- Suliffeqarfissuarmi Sulisoqarnermut pisortaq/CHRO: Bebiane Boye Hansen
- Tuniniaanermut pisortaq/CCO Niels Clemensen
- Ingerlatsinermut pisortaq/COO Ivalu Kleist
Direktøritut pisortanngortinneqartut sisamaasut januaarip aallaqqaataa 2022 aallarnerfigalugu pisortaqatigiit tamarmiusut ilagilissavaat uku peqatigalugit:
- Aningaasaqarnermut pisortaq/CFO Peter Christoffersen
- Pisortaanerup tullia/Deputy CEO Aviâja Lyberth Lennert
- Pisortaaneq/CEO Verner Hammeken
Pisortaanerup Verner Hammekenip erseqqissaassutigaa, suliffeqarfimmi pisortaqatigiit sulisullu akunneranniittup peerneratigut ataatsimoornissaq qulakkeerluarsinnaanerulerneqassasoq Direktør Verner Hammeken understreger, at der fjernes et lag i virksomheden mellem direktionen og medarbejderne, når den daglige ledelse bliver en del af direktionen:
- Pisortaqatigiit sulisullu akunneranniittup peerneratigut ataatsimoornissaq qulakkeerluarsinnaanerulissavarput, pisortaqatigiinnilu ataatsimoorluni pilersitseqatigiittarneq pitsaanerusoq angusinnaallugu, pingaartumik eqimattat pineqartut taama assigiinngisitaartigitillugit, ukioqqortussutsimut/misilittakkanut, suiaassutsimut tunuliaqutigisanullu tunngatillugu, aammali suliaqarfigisamut tunngatillugu, Verner Hammeken oqarpoq.