Royal Arctic Linep avammut nioqqutit assartorneqarnerannut akigititanik 32 procentinik qaffaanera sakkortuumik isornartorsiorneqarpoq, pingaartumik aalisarnermik inuussutissarsiuteqartunit. Akinik qaffaaneq kalaallit nioqqutaasa unammillersinnaassusaannut ingerlatseqatigiiffinnullu kinguneqartitsissasoq, inuussutissarsiortut isumaqarput, taamaalillunilu aamma sulisunut aalisartullu aningaasaataannut.

Kisianni avammut niuernermi assartukkanut qaffaaneq inissinneqarsinnaavoq, tassani ingerlatseqatigiiffiit kujammut assartukkanut avammut assartukkanit, assersuutigalugu kalaallinut atuisunut nassiussanit akiliisarnerat annikinnerujussuummat. Royal Arctic Linemi pisortaq, Verner Hammeken, Sermitsiaq.AG-mit apersorneqarnermini oqarpoq:
 

- Kalaallit nioqqutaasa unammillersinnaassuseqarnissaat tamatta isumaqatigiissutigaarput, kisianni aamma unammillersinnaassuseqartoqartillugu pissarsiarisanut akiliisinnaasoqarnissaa isumaqatigiissutigineqartariaqarpoq, Verner Hammeken oqarpoq.

Royal Greenlandimit isornartorsiuineq sakkortooq

Akit qaffanneqarnerisa kingorna containerimik qerititsiviusumik kujammut nassiussineq 28.276 koruuniussasoq, taanna innersuussivoq, akerlianik containerimik qerititsiviusumik Kalaallit Nunaannut nassiussineq 63.352 koruuninik akeqartoq.

Pisortallu oqarnera naapertorlugu avammut tunisinermi containerit imaqanngitsut immerneqarnissaannut kisimi tunnganngilaq, taakku qanorluunniit Danmarkimut assartorneqartussaammata. Royal Arctic Line nunatsinni avammut nioqqutinik containerinik 6.500-t missaanniittunik assartuisartoq, taanna oqaluttuarpoq, Kalaallit Nunaanullu containerinik qerititsiviusunik nioqqutissanik assartuinermut pisariaqartitsisoqartarluni.

Aalisarnermik ingerlatseqatigiiffissuaq Namminersorlutik Oqartussanit pigineqartoq Royal Greenland nalinginnaanngitsumik RAL-ip periusaa aamma akit qaffanneqarneri pillugit sakkortuumik isornartorsiuivoq. Inuussutissarsiortut akit qaffannissaasa atulernissaanut ullunik arlaqanngitsunik periarfissinneqartut, ingerlatseqatigiiffik ilaatigut erseqqissaavoq.

Royal Greenlandimi pisortaagallartup aamma CFO-p, Nils Kinnerupip, pisup ingerlanneqarnera piviusorsiunnginnerarlugulu suliamik ilisimasaqanngitsuuneraavoq. RAL suliffeqarfimmini tamakkiisumik paasisimasaqanngitsoq, taanna isumaqarpoq.

Politikkikkut akuerineqarnissaa sivisuumik suliarineqartoq

Piffissaq kingulleq ajortumik ingerlasumik iluarseeriarnerunngitsoq, Verner Hammeken oqarpoq, tamannali umiarsuaatileqatigiiffiup aasaanerani 2022-mili pilersaarutigalugu suliarisimagaa oqaatigaa, tassani containerit Kalaallit Nunaata avataani isumagineqartarnerinut akigititat qaffannerannit RAL eqqugaasussanngortoq paasineqarpoq, piffissami tassani Danmarkimi aningaasat naleerukkiartornerat qaffasippoq.

- Pingaartumik assartukkat Danmarkimi isumagineqarnera pineqarpoq, tassani aningaasat naleerukkiartornerat maanga sanilliullugu qaffasinnerujussuuvoq. Containerit poortorneqarnerinut, usilersorneqarnerinut usingiarnerinullu sunniuteqarpoq, tamatumalu saniatigut pingaartumik avammut tunisinermi nukissamik atuineq qaffasippoq, contarinerit qerititsiviit aaneqannginnerminni innaallagiamik atuisaramik, Verner Hammeken nassuiaavoq.

Pisortap oqarnera naapertorlugu politikkikkut akuerineqarnissaa sivisuumik suliarineqarsimavoq, ingerlatseqatigiiffiullu akuerineqartinnagu akit qaffanneqarnissaat nalunaarutigerusunngilaa. Aammattaarlu akit allanngortinneqanngippata, RAL-imut ullormut 100.000 koruuninik akeqalertussaassaaq:

Amigartooruteqarnissat paasineqartoq

- Oqaloqatigiinneq pitsaasuusarpoq, kisianni akit qaffanneqarnissaannik oqaloqatigiinneq aamma ajornakusoortuassaaq. Pingasoqiusamik isumaqatiginninniartoqarnissaa orniginartinngilarput, taamaattumik isumaqatiginninniarnerit sulisitsisutsinnut isumaqatiginninniutigaagut, Verner Hammeken oqarpoq.

Ukiup affaanut nalunaarusiami 2022-mi aasaanerani RAL-ip ukioq tamakkerlugu amigartooruteqarnissaa ilimagineqartoq, aningaasaqarnermut aqutsinermut tunngatillugu pisortaq taama oqarpoq, kisianni akit qaffanneqarnerisigut aningaasaqarneq 2023-mi iluarsiniarneqarpoq.

RAL-ip assartuinermut akit 2015-imili qaffassimanngikkai, Verner Hammekenip oqaatigaa, peqatigisaanillu umiarsuarnik nutarterisimavoq. Assartorneqartut amerlinerat pissutigalugu inuiaqatigiinni akit malunnaatilimmik qaffanngikkaluarlugit taamaaliortoqarsinnaasimavoq. Pissutsit taakku 2022-mi atuukkunnaarput, Kalaallit Nunaata avataani aningaasat naleerukkiartupiloormata.

Sipaarniarneq aallartinneqartoq – umiarsuaq tunineqaratarsinnaasoq

RAL sipaarniarnissamik pilersaarummik annertuumik aamma suliaqarpoq, Sermitsiaq.AG-llu paasissutissaatai naapertorlugit, umiarsuup Mary Arcticap tunineqarnissaa ilaavoq. Verner Hammekenip tamanna uppernarsarnianngilaa, kisianni suliffeqarfiup sipaarniarnerani arlaannik immikkoortitsisoqanngitsoq oqarpoq.

RAL-illu umiarsuarmik tunisaqarnissaanik periarfissaq misissorneqarpoq, tamatumalu kingorna RAL-ip umiarsuaq piffissami umiarsuaatileqatigiiffiup pisariaqartitaani taamaallaat attartortassalluni, pisortaq nassuiaavoq.

Verner Hammekenip oqarnera naapertorlugu sipaarniarnermi sulisunik soraarsitsisoqassanngilaq.