RAL-ip kujammut assartuinermi akit 32 procentinik qaffappai
Kujammut avammut nioqqutinik assartuinermi akit aqagumit 32 procentinik qaffassapput. Sermitsiaq.AG-p tamanna tusarpaa. Aalajangerneq politikkikkut akuerineqarpoq.
Kujammut avammut tunisanut Royal Arctic Linemi assartuinermi akit 32 procentinik qaffanneqarnissaat Naalakkersuisut akueraat. Ineqarnermut attaveqarnermullu naalakkersuisup, Erik Jensenip Sermitsiaq.AG-mut tamanna uppernarsarpaa.
- Politikkikkut suliarineqarpoq, periarfissallu assigiinngitsut oqaluuserineqarnikuupput. Innuttaasut nunaqavissut illoqarfinni nunaqarfinnilu najugaqartut sapinngisamik eqqorneqannginnissaat ukkataraarput, Erik Jensen oqarpoq.
Akit qaffanneqarnerinut Royal Arctic Linemit Sermitsiaq.AG nassuiaatitsiniarsarigaluarpoq, kisianni oqaaseqarsinnaanngillat, aqagulu tusagassiuutinut nalunaarummik nassiussaqarniarput, umiarsuaatileqatigiiffik oqarpoq.
Akit qaffannissaannut inissaqarpoq
Sermitsiaq.AG-p paasissutissaatai naapertorlugit, akit qaffanneqarnissaasa atulersinneqarnissaat ulloq ataasiunngitsoq sioqqullugu inuussutissarsiortunut nalunaarutigineqarpoq.
Aalajangerneq inuussutissarsiuteqartut ilaannit akerlerineqarsinnaassasoq, Erik Jensenip nassuerutigaa.
- Aningaasat sumiluunniit nassaarineqarniarneranni tamani iluaqutitaqarlunilu ajoqutitaqarpoq. Tamanna qisuariarfigineqassasoq nalunngilarput, kisianni ingerlatseqatigiiffiit aningaasaqarnerat pitsaavoq, taamaattumik akit qaffanneqarnissaannut inissaqarpoq.
Nunatsinni naleqarnerulersitsinissamut piumassuseqalersitsinissaq
Akit qaffanneqarnerat suliffeqarfiit aalisakkanik qalerualinnillu pingajorarterutaanit annertunerusumik akiliisalerunik unammillersinnaassusaannut kinguneqarumaartoq, Erik Jensenip miserratiginngilaa, nunap avammut tunisanit isertitat 90 procentii taakkunanngaanneerput.
- Nioqqutit nunatsinni suliarineqarnerulernissaannut suliffeqarfinnut piumassuseqalersitsisinnaavoq, nioqqutillu avammut tunineqannginnerani naleqarnerulersitsilluni, taanna oqarpoq.
Taamatulli tunisassiorneq inatsimmut tunngatillugu piumasaqaateqarnerusussaavoq, taamaattumillu Naalakkersuisut ilaatigut inuussutissanut akisussaaffiup angerlaanneqarnissaanut periarfissaq misissoraat, Erik Jensen oqarpoq.