RAL-ip DMI paasissutissanik pingaarutilinnik ikioraa
Timmisartumi silasiortartut coronap ajornartorsiutaanera pissutigalugu paasissutissanik amigaateqarput. RAL-illi umiarsuaaniit Kalaallillu Nunaanni silasiorfinnit ballonit silaannarmut aallartinneqartartut iluaqutaapput.
Corona timmisartumi silasiortartunut ajornartorsiortitsivoq. Piffissamummi sivikitsumut silassap naatsorsorneqartarnerata annersaa timmisartunit Atlantikoq qulaallugu ingerlaartartunit pissarsiarineqartarpoq.
- Silaannakkut angallanneq 90 procentimik annikinnerulersimavoq, tamatumalu malitsigisaanik silassamik naatorsuiniarnitsinni kisitsisit ikinnerusut atortariaqartarpavut, DMI-mi silasiortut pisortaat Bent Sass oqarpoq.
- Qaammaammi kingullermi naqitsinertuffeqarluarsimanera tamatumani unammillernartitsisimanngilaq, naqitsiniisaffiilli silamik allanngortitsipallattartut ajornartorsiortitsipput.
Isumannaallisaanermut sunniuteqanngitsoq
Paasissutissat amigaatigineqartut nalunaaquttap akunneri 24-t angullugit silassap naatsorsorneqarnera 15 procentit missaannik nalornineqartoqartittarpaat. Tamanna isumannaallisaanermut sunniuteqartanngilaq, Atlantikorli qulaallugu timmisartorneq sivisunerulersissinnaavaa orsussamillu atuinerulersitsisinnaalluni.
Tamanna aamma Kalaallit Nunaanni sumiffiit assigiinngitsut silassaannut sunniuteqarneq ajorpoq.
Taamaakkaluartoq Kalaallit Nunaat silassamik naatsorsuinermut pingaaruteqarluinnartarpoq. Royal Arctic Line Atlantikup avannaatigut ingerlaarnermini ullormut marloriarluni balloninik silaannarmut aallartitsisarnissaanik DMI-mit isumaqatigiissuteqarfigineqarsimavoq.
Ullormut ballonit arfinillit
Royal Arctic Line Danmarkip Kalaallillu Nunaata akornanni umiarsuit pingasut atorlugit nalinginnaasumik assartuisarpoq. Taamaalilluni ullormut ballonit arfinillit silaannarmut aallartinneqartarput, taakku silasiorttut pitsaalluinnartunik paasissutissittarpaat.
- Ballonit silaannarmut aallartinneqartartut paasissutissanik amigaatigineqartunik tunniussisarput - taakkulu paasissutissanik timmisartunit pissarsiarineqartartunit pitsaanerusarput, ballonimmi silaannartu 10 aamma 15 kilometerit qummut ingerlaarnerminni silamik uuttortaalluarnerusaramik. Timmisartumit paasissutissat pissarsiarineqartartut qutsissoq aalajangersimasoq kisiat uuttortartarpaat, Bent Sass nassuiaavoq.
- Paasissutissat najoqqutassiamut annertuumut, nunat tamalaat silasiortuinit WMO-mit aqunneqartumut ilanngunneqartarput.
DMI silassamik naatsorsuinermut pingaaruteqarpoq, nunarsuummi immikkoortortaani annertuumi, Naalagaaffeqatigiinni tamani silamut tunngatillugu paasissutissanik katersisarnermik akisussaaffeqarami.
Tasiilami ajornartorsiuteqartoqartoq
Atlantikoq qulaallugu timmisartut paasissutissiisarnerisa saniatigut, satellitsikkut aamma nakkutilliisoqarlunilu nunami radioqarfinnit aalajangersimasunit nakkutilliisoqartarpoq. Kalaallit Nunaanni radioqarfiit pineqartut ukunaniipput Danmarkshavn (Station Nord), Aasiaat, Ittoqortoormiit, Narsarsuaq aamma Tasiilaq.
Tasiilami radioqarfik maannakkorpiaq killilimmik taamaallaat atuuppoq.
- Kingoraartissat Frankrigemeersut amigaatigineqarput - maannakkullu inissisimanermi kingoraartissat Tasiilamut anngunniarnerat unammillernalaarpoq, Bent Sass oqarpoq.