RAL-ip amigartoorutini annikillisikkai

Royal Arctic Linep ukiup affanut nalunaarusiaa coronamit aamma Islandimiumik Eimskipimik assartueqateqartalernermik ammaasimasumit, Vessel Sharing Agreemnetimit (VSA) sunnerneqarsimavoq.

2020-ip ukiuata affaani siullermi 37,3 millioner koruuninik amigartooruteqarneq coronap kingunerinut atatillugu ingerlatsinerup pitsaanerulersinneqarsimaneranut atatillugu isigineqassaaq.

- Aningaasaqarneq eqqarsaatigalugu ukiup affaani siullermi angusat naammagisimaarpavut, angusat Coronap Arctic Umiaq Linemut toqqaannartumik sunniuteqarsimanera eqqarsaatigalugu naatsorsuutigisamit pitsaanerupput, ingerlatseqatigiiffimmit oqaatigineqarpoq.

VSA-p aallartinneqarnera

VSA-mik aaqqiissuteqarnermut atatillugu, Reykjavik aqqutigalugu Tasiilamik kiffartuussinissaq ukiup naanerani aallatinneqassaaq. Tamatuma malitsigisaanik sapaatip akunneri pingasukkaarlugit assartuisarneq allanngortillugu sapaatip akunnera allortarlugu pisalissaaq.

- Aqutsinerup tungaatigut suliassat annersaat tassaasimavoq, sulilu taamaalluni, ingerlatseqatigiiffimmut nalorninaateqarsinnaasut ingerlaavartumik annikillisarnissaat, VSA-llu aallartisarneratigut ingerlatsinitsinni nalorninaateqarsinnaasut annikillisinneqangaatsiarput, RAL ukiup affaanut nalunaarusiaminut atatillugu tusagassiorfinnut nalunaaruteqarnermi ilisimatitsivoq, nalunaarusiaq nassaarineqarsinnaavoq UANI.

RAL-imit ilisimatitsissutigineqarpoq, assartueriaatsip nutaap, Aalborgip Nunattalu akornanni aaqqiissutaasumut pioreersumut pitsaanngitsumik sunniuteqannginnissaa qulakkeeqqartinnagu, Aarhusimit umiarsualivinniillu allanit nassiussanik tigooraasarnissaq akuersaarniarnagu.

Coronap kinguneri

Corona sulifffeqarfiup kaaviiaartitaanut annertuumik sunniuteqarsimanngilaq, suliffeqarfiulli ilaasa ukiup affaani angusaanni takuneqarsinnaavoq.

RAL-p qammatini arfinilinni siullerni kaaviiaatitai 415 millioner koruuniusimapput, ukiup siuliani piffissami pineqartumi 407 millioner koruuniusimallutik.

Ukioq 2020 tamakkerlugu corona ajornartorsiortitsissappat, kaaviiaartitat 10 millioner koruunik apparsnissaat naatsorsuutigineqarpoq. Tamaasali ataatsimut isigalugit, maannakkorpiaq nalilerneqarpoq, Coronap sunniutissai 65-70 millioner koruuninik naleqassasut, RAL ukiup affaanut nalunaarusiamini ilisimatitsivoq.

Suliffeqarfiup naatsorsuutigaa, ukioq naallugu ingerlatsinermi angusat 22 millioner koruuninik pitsanngortinneqassasut. Tamatumunnga ilaatigut pissutaavoq, sanaartornermi atortussanik assartuinerusimaneq kiisalu aalisakkanik kujammut assartuinerusimaneq.

- Aamma sullitanit aningaasassatta pissarsiarinissaannut pikkorinnerusimavugut, pisortaq Verner Hammeken nangilluni oqarpoq.

Ukiumi angusatigut amigartooruteqarnissaq naatsorsuutigineqarpoq.

Coronap kingunissai pissutigalugit, akileraarutissat suli peernagit ukiumi angusatigut sinneqartoorutissatut naatsorsuutigineqarsimasut ukiup affaanut nalunaarusiami allanngortillugit, 30 aamma 45 millioner koruunit akornanni amigaartoorutissanngortinneqarput.

RAL-imili aningaasaqarnermut pisortap Peter Christoffersenip ilisimatitsissutigaa, kisitsisit aggustip qaammataaneersut pissarsiarineqarsinnaanngormata, angusassatut naatsorsuutigisat allanngorteqqinneqarsimasut. Taamaammat suliffeqarfimmit naatsorsuutigineqarpoq ukiumut 15 millioner koruunit missaannik amigartooruteqartoqarnissaa.