RAL-ip amigartoorutai miliuunilikkaajusut amerliartortut
Ukiup affaani siullermi 59 millioner koruuninik amigartooruteqarpoq. Naatsorsuutigisamit amigartooruteqarnerusoqarpoq, RAL-imilli angusat naammagisimaarneqarlutik.
Namminersorlutik Oqartussat umiarsuaatileqatigiiffiutaat Royal Arctic Line ukiup affaani siullermi akileraarutit suli peernagit 59 millioner koruuninik amigartooruteqarsimavoq. Siorna piffissami pineqartumi 37 millioner koruuninik amigartooruteqarsimalluni.
Kaaviiaartitat siorna ukiup affaani siullermi 415 millioner koruuniusimariarlutik ukioq manna 443 millioner koruuninngorsimapput.
- Kaaviiaartitat ineriartorfiunerinut malunniuteqarnerpaasut tassaapput mittarfiliortiternernik suliniutinut attaveqaasersuutinullu assingusunut aningaasalersuinerit niuerfinniillu nutaanit kaaviiaartitat ingerlatseqatigiiffiup anguniagaata ataateqqavaat, RAL ukiup affaanut nalunaarusiami allappoq.
Amigartoorutit siornali amerliartorsimagaluartut RAl-imi aqutsisut naammagisimaarpaat.
Atlantikoq ikaarlugu sullissineq pitsaanerulersimasoq
Aqutsisut nassuiaatigaat, amigartoorutit annertusiartornerannut pingaarnertut pissutaasimasut coronamut atatillugu killilersuutit taakkulu malitsigisaannik sunniutaasimasut kingunerannik aningaasartuuteqarnerusimaneq.
- Nalikilliliinerni aningaasaliinermilu aningaasartuutini ineriartornermut killilersuutillu kingunerisaannik umiartortut akissarsiaannut aningaasartuuteqarnerunermut naleqqussaasoqarpat Royal Arctic Line 2020-mitulli angusaqassaaq, Atlantikuli ikaarlugu sapaatit akunnikkuutaartumik angalasarnikkut kiffartuussinikkut pitsanngoriaateqartitseqqilluni, taamaattumillu angusat naammagisimaarnartutut nalilerneqarput, RAL nalunaarusiami allappoq.
RAL-ip 2021-mut tamarmiusumut naatsorsuutigisani eqqarsaatigalugit ukiup affaani siullermi naatsorsuutigisat 17 millioner koruuninik ikilisinneqarput akileraannginnermi 12 millioner koruuninik annaasaqarnermit 1 million koruunimik sinneqartooruteqarnermut.
- Corona pillugu killilersuutit ingerlateqqinneqarnerat nalikilliliinermut pissutaanerpaavoq ukiumut sunniutaasussatut ataatsimut 7 millioner koruunit naatsorsuutigineqarlutik. Taakkunannga 10 millioner koruunit inuttat taarsernerinut aningaasartuuteqarnerunermut toqqaannartumik attuumassuteqarput sinneruttullu 7 millioner koruunit Islandimi niuerfimmi aallartisarniarnermi ajornartorsiutinik pissuteqarlutik, RAL ukiup affaanut nalunaarusiami allappoq.
Nunarsuarmi assartuinermi akigitiat qaffapiloorsimasut - Kalaallilli Nunaanniunngitsoq
Royal Arctic Line ukiup affaanut nalunaarusiamini allappoq, nunarsuaq tamakkerlugu assartuinikkut attaveqaatit annertuumik tatisimaneqarsimasut:
- Pisiumassuseq suli qaffakkiartorpoq, nunarsuarli tamakkerlugu assartuinerit naammassiniarnerisa kinguaattoorutigineqarneri Coronamut tunngassuteqartut naammassisaqarsinnaassutsip oqaluttuarisaanermi aatsaat taama annertutigisumik tatineqarneranik kinguneqarpoq. Tamannalu nunarsuaq tamakkerlugu assartuinermut akigititat annertuumik qaffariarnerannik kinguneqarpoq, RAL allappoq.
RAL-imilli taamatut ineriartortoqarnera Kalaallit Nunaannut mianersuutigisimavaa, assartuinermilu akigititat patajaattut atuutsiinnarsimallugit, RAL-imit oqaatigineqarpoq:
- Sunniuteqarluartorlu China Container Freight Index qiviaraanni, 2015-imi marsip Royal Arctic Linep kingullermik assartuinermut akigititaminik qaffaaffigisaata 2021-milu marsip akornanni nunarsuaq tamakkerlugu assartuinermut akigititat 100 %-it sinnerlugit qaffassimapput, piffissami pineqartumi uulia USD-llu allanngorarnerat ilanngunnagit.
Islandimit nioqqutissat amerlanerulersut umiarsuillu nutaajunerusut
RAL-imit oqaatigineqarpoq, Eimskipimik assartueqateqartalerneq pissutigalugu Islandip Kalaallillu Nunaata akornanni niueqatigiinneq annertunerulersimavoq:
- Islandip Nunattalu akornanni maanna sapaatit akunnikkuutaartumik aqqusaartoqartarnera pissutigalugu annertuumik siuariartoqarnera takusinnaavarput siornamut naleqqiullugu 60 %-it sinnerlugit. Tamannalu illoqarfinni anginerusuni nioqqutissat Islandimeersut amerlinerisigut nioqqutissallu ilaasa akiisa qaffasissusaasigut malugineqarsinnaavoq.
RAL tamatuma saniatigut naatsorsuutimini allappoq, umiarsuarnut aningaasaliissuteqarsimanerup malitsigisaanik umiarsuit nutaajunerulersimasut:
- Aningaasalersueqqinnermi umiarsuaatit 2015-ip naalernerani agguaqatigiissillugu pisoqaassusiisa ukiunit 30-t missaannit maanna ukiunut 14-inut appartinneqarpoq. Umiarsuaatillu agguaqatigiissillugu pisoqaassusiat 2021-p naalernerani ukiut arfiniliussapput 1,1 milliarder koruuninillu naleqarlutik, RAL allappoq.