RAL immikkut umiarsuamik Tasiilaliartitsiniartoq
Royal Arctic Linemit Tasiilami sakkortuumik piterartoqarnerata kinguneranik sanaartornermi atortussanik pisariaqartitsisoqalersimammat umiarsuarmik Tasiilaliartitsinissamut periarfissanik misissuisoqarpoq.
Tasiilami sanaartonermi atortussat pisariaqartinneqarluinnarput.
Tamatumunnga sakkortuumik piterarsimanera pissutaavoq, tunup illoqarfiani piterartoqarmat aserortersimasorpassuaqalersimavoq.
Tamatuma malitsigisaanik Royal Arctic Linemit umiarsuarmik decembarip qaammataani Tasiilaliartitseqqinnissamut periarfissaqarnersoq misissorneqarpoq. Tasiilamut umiarsuaq kingulleq novembarip qulingani aqqusaartussatut pilersaarutigineqaraluartoq, ingerlatseqatigiiffimit nittartakkakkut ilisimatitsissutigineqarpoq.
Iserit A/S oqaloqatigineqartoq
Tasiilap decembarimi tikinneqarsinnaaneranut sila sikoqassuserlu soorunami apeqqutaassapput. Royal Arctic Linemillu suliassamut tamatumunnga umiarsuarmik allamukartumik aqqusaartitsisoqarsinnaaneranut periarfissanik misissueqqaarallartoqarpoq.
Umiarsuaatileqatigiiffimmit sanaartornermi atortussanik pisariaqartinneqartunik pissarsinissap umiarsuarmik aqqusaartitseqqinnissamut ataqatigiissaarneqarnissaa qulakkeerniarlugu Iserit A/S oqaloqatigineqarpoq. RAL-imit naatsorsuutigineqarpoq, tamanna pillugu sapaatip-akunnerarta matuma naannginnerani erseqqinnerusumik nalunaaruteqartoqarumaartoq.