RAL-imi siulittaasunngortup ammanerunissaq qulakkeerpaa
Royal Arctic Linep siulersuisuini siulittaasup Ulrik Blidorfip ingerlatseqatigiiffiup pingasunngornermi ataatsimeersuarnerani, Namminersorlutik Oqartussat ingerlatseqatigiiffinnik aqutsilluarnissamut najoqqutassiai arlalitsigut malinniarlugit aalajangerami, ingerlatseqatigiiffinni Namminersorlutik Oqartussanit pigineqartuni suleqatini malunnaatilimmik tatisimalerpai.
Tele Greenland ukiuni arlalissuarni pisarnera assigalugu, Royal Arctic Linemi siulersuisut pisortat akissarsiaat aamma atorfeqarnerminni atugaat ammasuutinneqarnissaat aalajangiuppaat.
Ulrik Blidorfip pisortanit nalunaarummini ima oqarpoq – Sermitsiaq.AG-p ingerlatsivinni aqutsilluarnissamut Namminersorlutik Oqartussat najoqqutassiaannut suliffeqarfiit tassannga pigineqartut qanoq malinninngitsiginerinut qulaajaasumut poorskimi allaaserisaanut innersuussilluni.
Ammanerulersitsiniartoq
- Namminersorlutik Oqartussanit suliffeqarfittut pigineqartutut inuiaqatigiinnut akisussaaqataasutut, najoqqutassiat atuuttut naapertorlugit Royal Arctic Linep 2019-imi ingerlatseqatigiiffiup aqutsisuini ammanerunissap annertusarneqarnissaa sulissutiginiarpaa. Pisortat akissarsiaat pillugit qanittukkut ilaatigut annertuumik oqallittoqarnikuuvoq, Royal Arctic Linep 2018-imi ukiumut nalunaarutaani nalunaarutit annertunerulernissaat takuneqarsinnaassaaq, Ulrik Blidorf oqarpoq.
Najoqqutassiami Namminersorlutik Oqartussat 2012-imili atuutilertitaani immikkoortut tamakkerlugit suli naammassineqanngitsut, siulersusunut siulittaasoq Sermitsiaq.AG-mut ilisimatitsivoq.
Alloriarneq siulleq tiguneqartoq
- Kisianni maanna alloriarneq siulleq tiguarput. Suliassap tamatuma pingaartilluinnakkama aallartinneqarnissaa siulittaasunngoramali anguniarpara, Ulrik Blidorf ilisimatitsivoq.
Pisortat pillugit, 2018-imi pisortaanermik Verner Hammekenimik inuttaqartoq, naatsorsuutini uku takuneqarsinnaapput:
- Akissarsiat aalajangersimasut: 2.655.000 kr.
- Soraarnerussutisiat: 230.000 kr.
- Bonusit: 100.000 kr.
- Katillugit: 2.986.000 kr.
Tamatuma saniatigut uku ilisimatitsissutigineqarput:
Pisortaq nammineq pisiaralugu inimini najugaqarpoq, Royal Arctic Linep siulersuisuini ingerlatsivinnilu allani siulersuisunut ilaasortaanerminit akissarsiarititaasut piumasimanngilai, unammilleqatigiinnermullu tunngasumik suliunnaarnerup kingorna qaammatini aqqaneq-marlunni pituttugaalluni, aningaasanik pisassaqarfiunngitsumik. Pisortaq qaammatit aqqaneq-marluk sioqqullugit soraarsinneqarsinnaavoq, soraarsitaanermut atatillugu siumut isumaqatigiissutaareersumik aningaasartaqanngitsumik, namminerlu qaammatit pingasut sioqqullugit soraarniuteqarsinnaalluni. Tamakku saniatigut Kalaallit Nunaanniit pequtit/pisattat nassiunneqarnerinut akiliunneqarsinnaavoq, inummut ataatsimut Danmarkimi feeriarnissamut akiliunneqarsinnaavoq, biileqartinneqarpoq, oqarasuaateqartinneqarpoq internet-eqartinneqarlunilu, aammalu qarasaasiaq ipad-ilu atorsinnaallugit
Bonusi millineqartoq
Aammattaaq Verner Hammeken 2018-imi akissarsiai 2017-imut sanilliullugit ikileriarsimasut takuneqarsinnaavoq, ingammik bonusi 90.000 koruuninik millineqarsimammat, tamanna 2017-imi ingerlanerliortoqarneranik pissuteqarsimassaaq, tassani amigartoortoqarlunilu it-mik atortut nutaat atulersinneqarneranni ajornartorsiortoqarpoq, tamatumalu kinguneranik containerit nassiussorneqarneri ilaatigut ajuissortoqarpoq.
Decembarip 14 –anni 2018-imi Ulrik Blidorfip nalunaarutigaa, pisortat marlunnik ilaneqarismasut, pisortap tullersortaa Aviâja Lyberth Lennert aamma aningaasaqarnermut pisortaq Peter Christoffersen.