RAL-i ukiumut naatsorsuutiminik rekortiliilluni saqqumiussivoq

2016 umiarsuaatileqatigiiffimmut Royal Arctic Linemut angusarissaarluarfiuvoq.

Suliffeqarfik akileraarutinut ilanngaatiginnginneranni 143 millioner koruuninik sinneqartooruteqarpoq, akileraarutillu ilanngaatigereerneranni sinneqartoorut 98 mio koruuniullutik, tamannalu umiarsuaatileqatigiiffiup oqaluttuarisaanerani angusarissaarfiunerpaavoq.

Umiarsuaatileqatigiiffiup nammineq aningaasaatai 649 mio. koruuniupput, 2015-mi 551 mio. koruuniusimasut.

Tamanna tunngavalugu angusat 'iluarisimaaneqarput'.

Sulisut ikinnerusut

Umiarsuaatileqatigiiffimmi suliffeqarfissuup inissisimanera aaqqissuussaaneralu peqqutigalugit iluanaaruteqarfiusimavoq. Umiarsuaatileqatigiiffimmi sulisorineqartut massakkut 706-put ukiup siuliani 722-llutik

-Maanna 2016-ip naanerani oqarsinnaavugut anguniakkap tungaanut ajunngitsumik ingerlalluta. 2016-imi Royal Arctic Line Eimskipip attaveqarfigisartagaannut suleqatigiissinnaanermik alloriaateqarpoq. Attavigisami peqataalernerup kingunerissavaa sullissinerput malunnarluartumik eqaannerulerlunilu pitsaanerulernissaa. Saniatigullu, umiarsuaatigut nutaanngililersut eqqarsaatigalugit, aningaasaliinissanut ingerlatsinernullu aningaasartuutitigut sipaaruteqarsinnaalissalluta, Royal Arctic Line siulersuisuani siulittaasoq, Kuno Fencher, pisortaanerlu Verner Hammeken allapput.

Islandmi umiarsuaatileqatigiiffiup suleqatiginera

2016-ip ingerlanerani Royal Arctic Linep Islandimiut umiarsuaatileqatigiiffianik Eimskipimik suleqatiginninnerulersinnaaneq misissorpaa.

- Naatsorsuutigineqarporlu misissuinerit kinguneriumaaraat kingusinnerpaamik 2019-ip qiteqqunneraniit ingerlatsinermi angallatinik suleqatigiissitsilluni ingerlaartalernissaq, umiarsuarnilli attartornikkut suleqatigiinnissaq siusinnerusukkut aallartinneqarsinnaalluni, pisortat nalunaarusiaannit takuneqarsinnaavoq.

Aqutsisunik allannguineq

Pisortat akornanni Niels Clemensen tunuarpoq pilersaarusiuussisarfimmilu atorfimmini allamik taarserneqarani.

Anders Bay Larsen umiarsuarnik ingerlatsivimmi februaarip aallaqqaataa 2017 aallarnerfigalugu Nuummut nuunneqarneranut atatillugu pisortaagallartunngortinneqarpoq.

Allannguinermut atatillugu Anders Bay Larsenip aamma akisussaafigilerpaa inuttalersuisarnermut immikkoortortaqarfik. Ivalu Kleist pisortat akornannut inissippoq, Ivalu Kleistillu atuisunut kiffartuussivik ingerlatarilerlugu, immikkoortortaqarfik siornatigut suliffeqarfiup iluani tuniniaanerup ataaniissimagaluarpoq.

- Allannguineq pivoq kiffartuussinitta iluani kiffartuussinerup qitiutinneqarnerulernera aammalu aningaasarsiorfiusinnaasut aqunnissaasa sukateriffigineqarnerat, tassa taaneqartut tamakkiisumik Royal Arctic Linep ingerlatsivianut Lars Borris Pedersenip pisortaaffigisaanut inissinneqarmata, umiarsuaatileqatigiiffik oqarpoq.

2016-imi assartukkat 11 %-inik amerlisimapput 2015-imi 758.000 kubikmeterimiit 2016-imi 845.000 kubikmeteriulersimallutik. Tassanilu naatsorsuunneqarlutik ilanngunneqarput assartukkat angisuut ataani kingusinnerusukkut nassuiarneqartut.