RAL-i Panam-imut aningaasaleeqataasoq
Umiarsuaatileqatigiiffik PANAM-imut atortunik assartuisuussaaq
Aningaasaliisartut allat assigalugit Royal Arctic Line aamma Panam2018 unammersuarnerup pitsaasumik ingerlanneqarnissaanut aningaasaliisartutut isumaqatigiissuteqarpoq. Royal Arctic Line-p aningaasaliisartutut ataatsimiititaliaata Ann-Britta Olsvig siuttoralugu aaqqissuussineq taama annertutigisoq tapersersorsinnaangamikkut nuannaarutigaat.
- Panam2018 ukioq manna Kalaallit Nunaanni timersornermik aaqqissuunneqartussani annerit ilagaat. Aaqqissuussinerlu taama annertutigisoq soorunami peqataaffigerusupparput. Panam2018-imullu atatillugu Aalborgimiit Nuummut imaatigut assartuinikkut tapersersuissaagut.
Panam2018-imut ataqatigiissarisup Poul Petersenip RAL-ip suleqatiginissaa pingaartutut isigaa.
- Panam-imi pissartanngorniuttoqarnissaanut atortut arlallit Danmarkimiit Frankrigimiillu umiarsuarmik assartorneqartariaqarput, tapersersuinerlu una pingaaruteqartupilussuuvoq annertuunullu aingaasartuutissanut matussuseeqataassalluni.
Juunip 15-ianiit 25-iata tungaanut Nuuk Panam2018-imut aaqqissuisuussaaq. Tassungalu atatillugu kalaallit nunanut allanut unammisartuisa Danmarkimi Tysklandimilu 2019-imi nunarsuaq tamakkerlugu pissartanngorniuttoqarnissaanut Amerikap nunavittaaneersut unammisaqattaassavaat.