RAL atuisunut ikiuiniarluni sapinngisaminik iliorpoq – sulili ajornartorsiorpoq
Quppersakkat paasissutissallit, inniminniinermut tunniussinissamullu killiliussanut skemat nutaat aamma Aarhusimi Aalborgimilu sulisut suleqatigiissinnaanerat. Suleriaatsit nutaat RAL-ip taamatut iliuuseqarfigai. Kisianni atuisunut pisariitsuinnaanngilaq.
Arlallit Kalaallit Nunaannit Aarhusimut qerisunik nassiussanik aalleraangamik ajornartorsiortarput. Sumiiffinnut pingasunut nioqqutissanik aallerfiusinnaasunit sulisut paasissutissiisannginnerat aamma ajornartorsiutaavoq.
Tassami qerisunik, nillataartunik aamma nassiussanik nalinginnaasunik ataatsimut aallertarfeqanngilaq.
Kisianni qanoq nassaarineqarsinnaappat?
Aarhus havn angineruvoq kukkunernilu aalajangersimanerulluni
Unammilligassat arlalinnik pissuteqarsinnaasut, Royal Arctic Line atuisoqarnermut pisortaq, John Aage Nielsen oqarpoq.
- Aarhus havn Aalborg Havnimi anginerujussuuvoq, Aarhusimilu nerisassanik nakkutilliinermut aqutsisoqarfik Aalborgimit allaanerulaartumik suliaqartarpoq, tassanilu nioqqutissanik Kalaallit Nunaannukartunik tassanngaanniillu tikittunik ‘pitsaanerpaamik periutsimik’ ineriartortitsisoqarsimavoq.
Aarhusimi ilanngaaserisut kikkut tamarmik assigiimmik pisarpaat, tassanilu nassiussat tiguniaraanni pappiaqqat immersorneqarneri eqqortuussapput.
- Assersuutigalugu atuisup nassiussinermi immersugassami appat pingasut nassiussimallugit allassimappagu, poortukkamilu 1 kilomik mattammik ilanngussisoqarsimasoq paasineqarpat ajussaaq, John Aage Nielsen nassuiaavoq.
- Taamaattoqartillugu imminut qiviartariaqarpugut, atuisunullu pitsaanerusumik qanoq attaveqarsinnaanerluta misissorlugu, taamatut pisoqarnissaa pinngitsoorumallugu.
It-mik ajornartorsiutit
Atuisunut pisortap oqarnera naapertorlugu ajornartorsiut alla anginerugunartoq tassaavoq, IT-mi atortut Aarhusimi atorneqartut.
RAL-ip atortuinut iluamik ataqatigiissinneqarsinnaanngillat, tamannalu atuisunut inuussutissarsiortunut containerinik atuisunut tunngatillugu ajornartorsiortitsivoq.
- Containerit inniminniinermi piffissami ilaanni piareersimaneq ajorput, aquttullu nassiussanik aggiussisut sulisutsinnut suliamik iluarsiinissamut ikiuussinnaasunut attaveqarnissaannik pisariaqartitsisarpoq. Tamatigut taamaaliorusunneq ajorput, tassami pingaarnertut suliassarinnginnamikku, kisianni iluaqutaangaatsiarsinnaasarpoq, atuisoqarnermut pisortaq oqarpoq.
Aarhusimi atuisut arlallit it-mi atortunik ajornartorsiuteqartut, umiarsualivimmilu akisussaasut ajornartorsiummik iluarsiinialeruttortut, John Aage Nielsen oqaluttuarpoq.